• Damb aguest procès, s’an digitalizat documents datadi entre 1466-1903 deth hons des notaries de Vielha e de Bossòst, der Ajuntament d’Arró, de Casa Matèria de Vielha e dera Colleccion PyrenMusèu, e s’a trabalhat tanben ena colleccion de vistes estereoscopiques en plaques de veire d’Aran e deth Pirenèu e enes diapositives deth fotograf Kim Castells, entà que, finalizadi es trabalhs pertinents, poguen èster consultadi en linha

Ath long dera passada setmana, era empresa especializada Croosland amièc a tèrme era digitalizacion de diuèrsi hons der Archiu Generau d’Aran, un trabalh inclodit laguens deth Plan Bruniquer, de preservacion deth patrimòni documentau de Catalunya.

Deth hons dera Notaria de Vielha e dera Notaria de Bossòst s’an digitalizat vint-e-tres protocòls notariaus des ans 1864-1903

Deth hons der Ajuntament d’Arró s’an digitalizat vint-è-dus pergamins (1486-1632) e de Casa Matèria de Vielha vint-è-dus pergamins mès (1466-1623).

Dera Colleccion PyrenMusèu s’a digitalizat er album de fotografies de Maurice Gourdon (1873-1883) e er album de litografies de Luishon, França, d’Eugène Ciceri (1873).

Tanben s’an amiat a tèrme trabalhs ena colleccion de vistes estereoscopiques en plaques de veire d’Aran e deth Pirenèu e enes diapositives deth fotograf Kim Castells. En totau s’an digitalizat mès de mil cinc-centes imatges.

Un còp se receben aguesti documents, des der Archiu se procedirà a inserir es imatges enes descripcions des sues respectives unitats documentaus entà que poguen èster consultades a traués d’Archius en Linha.