• Garantia Juvenil ei ua iniciatiua dera Union Europèa entà redusir eth caumatge juvenil, qu’aufrís incentius entara contractacion que se pòden compatibilizar damb es subvencions que preven es programes deth SOC.

• Se pòden redusir es cotizacions sociaus dera empresa enquià un 100% se se contracten joeni inscriti en programa.

Eth Departament de Joenessa deth Conselh Generau d’Aran a organizat aué dimèrcles, 18 de noveme, peth maitin ua session informativa sus bonificacions e ajudes as contractacions en marc deth programa Garantia Juvenil. Er objectiu d’aguesta session ère informar as autònoms, empresaris e empresàries dera Val d’Aran sus ajudes ara contractacion de joeni en marc d’aguest programa. I an assistit ua totau de 15 empreses.

Garantia Juvenil ei ua iniciatiua dera Union Europèa entà redusir eth caumatge juvenil, qu’aufrís incentius entara contractacion que se pòden compatibilizar damb es subvencions que preven es programes deth SOC. Damb tot, se pòden redusir es cotizacions sociaus dera empresa enquia un 100% se se contracten joeni inscriti en programa. Er objectiu dera Garantia Juvenil ei garantir que joeni de 16 a 29 ans arreceben ua aufèrta de trabalh, educacion o formacion, en un termini de 4 mesi dempús de finalizar era educacion formau. Garantia juvenil includís un totau de 100 mesures entà facilitar era insercion des joeni en mercat laborau, eth foment der esperit emprenedor, atau coma era melhora dera ocupabilitat.

Des deth Departament de Joenessa deth Conselh Generau d’Aran se trabalhe entà arténher es objectius que mèrque eth programa de Garantia Juvenil damb era collaboracion dera Direccion Generau de Joenessa dera Generalitat.

Eth vicesindic e conselhèr de Joenessa d’Aran, Luis Carlos Medina, a explicat “era session informativa d’aué ei fòrça important entà pr’amor qu’es empresaris dera Val d’Aran agen era maximala d’informacion sus totes es possibilitats qu’an en çò que tanh as ajudes e bonificacions ara ora de corbir es sues aufèrtes laboraus damb joeni de 16 a 29 ans”.