• Pòdiums entàs aranesi Sara Donés, Ariadna Rodríguez, Anna León e Guilhem Berini.
Era dimenjada passada se disputèc ena estacion francesa de Font Romeu eth campionat de Catalonha de Slopestyle.
Ara pròva anèren snowboarders de diferentes nacionalitats: francesi, espanhòus e andorrans, pr’amor qu’er eveniment ath delà de campionat de Catalonha se disputaue era pròva en format “open”. Açò dèc un punt de major qualitat ara competicion en tot incrementar era competitivitat entre es riders e en tot motivar-les encara mès ara ora d’afrontar-se as mòduls e sauts.
Pendent es entrenaments liures deth dia anterior ara pròva podérem gaudir d’un solei radiant, que facilitèc realizar infinitat de rondes pendent tot eth dia.
Eth snowpark de Font Romeu permetec gaudir de fòrça fluïdesa ena execucion des rondes, gràcies a ua cagira rapida qu’auie era longitud exacta deth madeish snowpark.
Açò se transmetec dirèctaments ena qualitat des trucs realizadi que podérem veir enes mès de 35 Snowboarders que disputèren era pròva pendent es entrenaments liures deth diuendres 20 e es classificatòries e finaus deth dissabte 21 de gèr.
Era Federacion Catalana d’Espòrts d’Iuèrn (FCEH) e es shapers deth snowpark de Font Romeu dessenhèren un polit slopestyle, exigent entàs snowboarders mès auançadi mès damb opcions mès accessibles entàs mès petiti des categories infantiles, tot açò permetec fòrça accion entre riders.
Eth Slopestyle se disposèc en tres sectors, eth prumèr damb un rail de 9 mètres de baishada e calaish de 4 mètres damb recepcion en arribent; eth dusau sector saut de 6 mètres plans, saut de 3 mètres plans e un saut petit adaptat as manòbres des mès petiti; eth tresau sector saut de 8 mètres plans, saut de 6 mètres plans e un aute saut petit adaptat as manòbres des mès petiti; eth quatau sector podíem gaudir d’un rainbow fòrça tecnic e un aute rainbow calaish simple a escuélher e dempús entà finalizar un calaish estret de 9 mètres.
Ei digne de mencion era fauta de relèu en bèri moments qu’afectèc a bèri raiders de manèra mès contondenta qu’a uns auti e açò dilhèu desvirtuèc un shinhau era igualtat ena competicion.
PÒDIUMS: Era seccion de snowboard s’adjudiquèc 7 pòdiums.
Era snowboarder aranesa, Sara Donés, guanhèc era pròva open slopestyle en Font Romeu ena categoria U13 Femenin, dusau posicion entara aranesa, Ariadna Rodríguez, e tresau posicion entara aranesa, Anna León.
Aguest pòdium siguec exactaments eth madeish entath campionat de Catalonha de Slopestyle damb es araneses, Sara Donés, ena prumèra posicion seguida d’Ariadna Rodríguez ena dusau posicion e Anna León ena tresau posicion.
Pera sua banda, er aranés, Guilhem Berini, obtenguec un meritòri subcampionat de Catalonha de slopestyle ena categoria U17 Masculin.
Vielha, 25 de gèr de 2017
Conselh Generau d’Aran: Núria Sanjuan
Hònt e foto: CAEI