S’inícien es òbres d’adequacion deth Refugi dera Honeria

  • Damb aguest projècte de valorizacion toristica deth refugi dera Honeria e er entorn dera Val de Toran, eth Conselh Generau d’Aran cerque potenciar aguesta zòna de forma responsable e sostenible, e ei previst qu’es trabalhs d’adequacion e melhora siguen finalizadi en mai de 2021

Dejà s’an iniciat es òbres d’adequacion deth Refugi dera Honeria, un projècte deth Conselh Generau d’Aran qu’a coma objectiu potenciar e valorizar tota aguesta zòna e es sòns entorns.

“Damb aguest projècte s’amiaràn a tèrme non sonque era reforma e adequacion deth refugi actuau senon tanben un seguit d’actuacions de condicionament enes camins istorics dera Val de Toran e era senhalizacion d’itineraris de senderisme, qu’ajudaràn a potenciar eth desvolopament toristic dera zòna d’ua forma responsable e sostenible”, afirme era sindica d’Aran, Maria Vergés.

Aguestes actuacions, qu’an un valor de lèu 450.000 euròs e son finançades damb eth suport deth Departament d’Empresa e Coneishement dera Generalitat de Catalunya, eth programa Leader deth Departament d’Agricultura, Ramaderia, Pesca i Alimentació e hons pròpris deth Conselh Generau d’Aran, auràn de perméter condicionar era Val de Toran e era sua accesibilitat, ath madeish temps que se presèrve er auviatge naturau e culturau que represente.

Es actuacions de recuperacion, condicionament e senhalizacion previstes enes camins de Grauèrs, Bedreda e eth camin dera presa de Barrier a Pradet, haràn qu’era aufèrta toristica d’aguest paratge sigue mès atractiva e variada entàs usatgèrs, mentre que, en çò que tanh ath refugi, non se cerque era sua ampliacion, senon eth sòn renauiment e adequacion, de forma qu’eth nombre de places se manten mès se realizen ua serie de melhores, pr’amor qu’era installacion ère obsoleta dempús de vint ans aufrint servici. Era prevision ei qu’aguesti trabalhs siguen finalizadi en mai de 2021.

Comments are closed.