Torisme Val d’Aran aurà ua relacion bilaterau damb era Agéncia Catalana de Torisme

Vielha, 28 de deseme de 2018.- Foment Torisme Val d’Aran, eth Patronat Public-Privat de Torisme dera Val d’Aran, aurà ua relacion bilaterau coma era que mantien eth rèste de Patronats de Torisme de Catalonha damb era Agéncia Catalana de Torisme, segontes a anonciat era conselhèra de Torisme d’Aran, Anna Díaz.

Era conselhèra de Torisme d’Aran, Anna Díaz, expliquèc qu’aguest ei er acòrd ath que a arribat eth Conselh Generau d’Aran damb era direccion generau de Torisme deth Departament d’Enterpresa e Coneishença dera Generalitat que n’ei titulara era conselhèra María Àngels Chacón.

Foment Torisme Val D’Aran, que ja hè 7 ans que hè part deth conselh de direccion dera Agéncia Catalana de Torisme aurà d’aguesta manèra eth madeish tracte qu’arreceben es deputacions catalanes. Díaz, arrebrembèc qu’actuauments era Val d’Aran ja a establidi convènis de collaboracion damb era Agéncia Catalana de Torisme e damb eth Ministèri d’Industria, Comèrç e Torisme deth Govèrn d’Espanha, e que contunharà de mantier coma enquiara ua estreta collaboracion damb eth Patronat de Torisme dera Deputacion de Lhèida.

En aguest sentit, era conselhèra de Torisme d’Aran soslinhèc qu’es accions de promocion qu’amie a tèrme Torisme Val d’Aran en Espanha e en estrangèr, tanben son productives entath rèste de Patronats de Torisme de Catalonha.

Fin finau, era conselhèra Anna Díaz, a arrebrembat qu’era Lei 1/2015, deth 5 de hereuèr, deth regim especiau d’Aran, contemple era atribucion des competéncies dera Val d’Aran en àmbit toristic, e destaquèc qu’aguest acòrd damb eth Govèrn dera Generalitat ei un pas mès entara reconeishença dera identitat pròpria d’Aran laguens de Catalonha.

Comments are closed.