Vielha, 14 de deseme de 2018.- Torisme Val d’Aran e Baqueira Beret seràn presents es dies 15 e 16 de deseme ena hèira monografica dedicada as espòrts de nhèu e de montanha Nevaria 2018, en Astúrias.

Nevaria, qu’enguan arribe ara 12au edicion, ei ua hèira d’arreconeishut prestigi que s’a convertit ena prumèra hèira d’aguestes caracteristiques en nòrd d’Espanha. Organizada per Ajuntament de Aller, damb era collaboracion dera Conselheria d’Emplec, Industria e Torisme deth Principat d’Astúrias, Nevaria arrecebec en 2017 mès de 12.000 visitants.

Ena edicion de 2018 Nevaria aufrís activitats entà toti es publics e edats, des d’un talhèr infantil d’elaboracion de bòles de nhèu, ua exibicion de Bike Trial a cargue de David Cachón, bicampion deth mon de Bike Trial e recòrd Guinness de saut ar uet, enquiara presentacion dera Unitat Canina de Rescat.

Era conselhèra de Torisme d’Aran, Anna Díaz, a afirmat qu’era preséncia de Torisme Val d’Aran amassa damb Baqueira Beret ena hèira Nevaria, servís ta fidelizar encara mès se cap as nòsti visitants asturians que son grani clients sustot en iuèrn e entà presentar en aguesta hèira de referéncia es novetats dera Val d’Aran e era estacion d’esquí Baqueira Beret aguesta sason.