Es melhors riders internacionaus tornen ara Val d’Aran es dies 1 e 2 de març ena tresau cite deth circuit de Copa deth Mon FIS de snowboard cross (SBX) dera sason

Vielha, 28 de hereuèr de 2019.- Era estacion aranesa d’esquí Baqueira Beret torne a acuélher ua pròva dera Copa deth Mon de snowboard cross (SBX) aguesta dimenjada dempús dera grana capitada dera darrèra edicion en 2016. Era competicion se disputarà ena zòna deth Blanhiblar de Beret, ena pista Boardercross.

Era pròva compdarà damb era preséncia der alemand Martin Noerl, actuau cap masculin deth circuit de Copa deth Mon de SBX, eth rider francés Pierre Vaultier, aur olimpic en PyeongChang’18, atau coma era cap femenina deth classament, era americana Lindsey Jacobellis, e era italiana Michela Moioli, aur enes darrèri Jòcs de Corèa deth Sud, ath delà dera participacion des riders dera RFEDI, eth medallista olimpic Regino Hernández e eth subcampeón mondiau en Sierra Nevada 2017 Lucas Eguibar. Ambdús concorreren ena edicion disputada ena estacion aranesa er an 2016 a on Eguibar siguec 3au e Hernández 5au.

Era Copa deth Mon SBX se tracte d’ua espectaculara modalitat deth snowboard, qu’es riders hèn en era gessuda des manges eliminatòries en grops de quate, en ua pista qu’includís sauts dubbies e peraltes. Ua disciplina qu’ei permetut eth contacte entre es esportistes pendent era baishada, per çò qu’era tecniciana, era velocitat e era estrategia son elements claus. Era pròva cònste de diuèrses rondes eliminatòries en baishades de quate riders, a on es dus mès rapids passen ronda enquia arribar ara finau.

En traçat dera Copa deth Mon de SBX de Baqueira Beret, de 1 km de longitud e un desnivèu de 115 m, concorreràn apuprètz 40 hemnes e 70 òmes que se ne classificaràn 16 participaires femenines e 32 masculins que lutaràn eth dissabte 2 de març enes eliminatòries entà arribar as finaus.

Era seguretat ei ua obligacion dera organizacion e ei pleaments prevista ena normatiua FIS que s’aplique ar eveniment. Ua equipa medicau complèta que garantís era atencion en contorn dera salut as competidors. Ei format de PMA (punt medicau auançat), equipa medicau deth SABS qu’aurà 2 mètges en circuit damb era equipa de Pompièrs d’Aran, ambulància e elicoptèr en cas d’èster de besonh era evacuacion deth herit.

Era Copa deth Mon SBX ena Val d’Aran compde damb eth supòrt d’institucions esportiues coma eth Conselh Catalan der Espòrt (CCE), amassa damb era RFEDI (Reau Federacion Espanhòla d’Espòrts d’Iuèrn) e era collaboracion des institucions locaus coma eth Conselh Generau d’Aran, er ajuntament de Naut Aran e era Deputacion de Lhèida. Tanben cau arrebrembar era vinculacion des clubs aranesi d’esquí e dera Associacion Volentaris d’Aran.