Federico Martín Bahamontes, Miguel Induráin, Pedro Delgado e Oscar Pereiro seràn en aumenatge dera Val d’Aran as guanhadors deth Tour eth dia 27 de mai
Aguesta tarde s’a presentat en Toulouse era etapa aranesa deth Tour 2016 e eth nau microsite dedicat ath ciclotorisme “Aran Total Bike”
Vielha, 19 de mai de 2016.- Eth sindic d’Aran Carlos Barrera, confirmèc aué qu’eth prumèr guanhador espanhòu deth Tour de França, Federico Martín Bahamontes, assistirà ar aumenatge organizat peth Conselh Generau d’Aran as guanhadors espanhòus deth Tour de França, damb motiu des actes organizadi en torn ara 9au etapa deth Tour 2016, que gesserà de Vielha-Val d’Aran eth dia 10 de Junhsèga.
Serà eth pròplèu diuendres dia 27 de mai en un acte presidit peth sindic d’Aran Carlos Barrera, qu’era Val d’Aran renderà aumenatge as sèt ciclistes espanhòus qu’en quauqua ocasion s’an proclamat vencedors deth Tour de França.
Es sèt ciclistes espanhòus guanhadors deth Tour son Federico Martín Bahamontes, Luis Ocaña, Pedro Delgado, Miguel Induráin, Oscar Pereiro, Alberto Contador e Carlos Sastre, que per orde cronologic disposaràn d’ua corba.
Es actes començaràn as 11 ores damb ua recepcion oficiau ena sedença deth Conselh Generau d’Aran.
Mès tard as 12 ores, serà quan en guardader deth Portilhon se harà era inauguracion oficiau d’un monolit commemoratiu òbra de David Garcia Ariza, damb es nòms des ciclistes, qu’ath sòn còp auràn cadun d’eri ua montjòia en cadua des sèt granes corbes deth vessant aranés dera carretèra deth Portilhon, damb eth sòn nòm e era data dera edicion en que se proclamèren guanhadors deth Tour de França.
Er eveniment compdarà damb era preséncia de quate des sèt ciclistes, Miguel Induráin, Federico Martín Bahamontes, Oscar Pereiro, e Pedro Delgado, ath delà de familhaus deth desapareishut Luis Ocaña. Carlos Sastre e Alberto Contador, an desencusat era sua preséncia per motius laboraus. Es actes feniràn damb ua arròda de premsa e era visita as installacions d’Aran Park.
Presentacion dera etapa aranesa deth Tour 2016 en Toulouse
Eth Conselh Generau d’Aran a presentat aguesta tarde era 9au etapa deth Tour de França 2016 que se disputarà per tèrres araneses eth dimenge 10 de junhsèga. Era presentacion a agut lòc en burèu de Torisme dera Val d’Aran e Baqueira Beret en Toulouse, e a compdat damb era preséncia d’Anna Díaz, conselhèra de Torisme e desvolopament economic e José Antonio Boya, conselhèr de Territòri deth Conselh Generau d’Aran.
Pendent era presentacion ath delà de dar a conéisher es detalhs organizatius e es dispositius operatius previsti entara etapa, s’a presentat eth nau microsite Aran Total Bike, restacat ara web de Torisme de Val d’Aran. En aguest espaci web, damb 84 seccions en quate idiòmes, se trobarà centralizada tota era informacion sobre BTT, ciclotorisme, DH e enduro, damb rotes de desparièrs nivèus e dificultats, eveniments ciclistes, notícies e enterpreses especializades dera Val d’Aran.
Eth dimenge 5 de junh, se celebrarà ua pedalada populara entà toti es aficionadi ath ciclotorisme, e un concors de diboishi sobre eth Tour de França que participaràn en eth es escolars dera Val d’Aran.
Damb un traçat inedit enquia ara ena istòria dera carrèra, era 9au etapa deth Tour de França 2016 gesserà de Vielha eth pròplèu 10 de junhsèga e aurà un recorregut de 184,5 Km en tot passar per 5 pòrts de montanha. Era etapa aranesa ei ua des escuelhudes entà èster emetuda integralaments en dirècte per television.
