• Er objectiu d’aguest viatge ei conéisher d’apròp aguest eveniment internacionau entà premanir, de cara a junhsèga de 2020, era prumèra edicion dera Val d’Aran by UTMB

• Deman tàs 14:30 ores se harà oficiau eth recorregut d’aguesta naua corsa de trail running

Ua delegacion deth Conselh Generau d’Aran formada, entre d’auti, peth sindic d’Aran, Francés Boya, responsables de Foment Torisme Val d’Aran, Pompièrs d’Aran, e organizadors dera Val d’Aran by UTMB se trapen aguesta setmana en Chamonix, en tot assistir ara celebracion dera UTMB Mont-Blanc.

Eth motiu d’aguest viatge ei víuer de prumèra man era celebracion d’aguesta competicion internacionau entà conéisher d’apròp es detalhs dera organizacion d’un eveniment d’aguesta magnitud, pr’amor qu’era Val d’Aran serà, en junhsèga de 2020, testimòni dera Val d’Aran by UTMB.

Aguesta naua pròva de trail running en plen còr des Pirenèus “ei un rèpte tath país que mos a de perméter plaçar Aran ena elit deth running mondiau”, afirme eth sindic d’Aran.

Era prumèra edicion dera Val d’Aran by UTMB se celebrarà es dies 3, 4 e 5 de junshèga de 2020 e era presentacion oficiau aurà lòc deman en Chamonix e es dies 4, 5 e 6 en Vielha, Salardú e Les.

Era celebracion d’un eveniment tan prestigiós e coneishut a nivèu mondiau supausarà un gran impuls toristic entath país ena sason d’ostiu, ua accion de desestacionalizacion plan importanta entà Aran.

Manquen pògues ores entà conéisher eth recorregut oficiau d’aguesta naua corsa internacionau qu’acuelherà era Val d’Aran. Deman, 29 d’agost, tàs 14:30 ores dejà se poderà consultar eth track, que s’anonciarà enes planes web oficiaus dera Val d’Aran by UTMB e eth Conselh, ath delà des hilats sociaus.