• Eth Govèrn deth Conselh Generau d’Aran ja a hèt es gestions apertientes deuant eth Departament de Territòri e Sostenibilitat dera Generalitat de Catalonha ara fin d’arténher ua ajuda extraordinària que permete rebastir damb urgéncia era carretèra de Canejan (Baish Aran)

Tecnics deth Conselh Generau d’Aran e dera Generalitat de Catalunya avalorant es danhs ena carretèra de Canejan.

Eth mes de gèr der an 2014 damb ua climatologia clonada ara dera setmana passada, ei a díder un episòdi de fòrtes nheuades seguit d’ua pujada de temperatures e transformacion des precipitacions de nhèu a aigua, produsiren un fòrt increment deth cabau enes barrancs provenenti des lateraus dera montanha.

En cas dera carretèra d’accès a Canejan, aguesta situacion s’agrave pr’amor qu’era evacuacion d’aguesti barrancs passe era major part pera vorera dera carretèra. Açò compòrte un esponjament deth terren e provòque es conseqüents esvauçaments.

Eth darrèr episòdi de ploges dera setmana passada provoquèc er esvauçament d’un tram de 32 mètres dera carretèra qu’a vist redusida era sua amplada a lèu 2 mètres. Aguesta circonstància ei doblement grèu pera perilhositat que compòrte era unica via d’accès ath pòble de Canejan.

Des deth Conselh Generau d’Aran ja s’an hèt es gestions apertientes deuant eth Departament de Territòri e Sostenibilitat dera Generalitat de Catalonha ara fin d’arténher ua ajuda extraordinària que permete rebastir damb urgéncia aguest tram afectat. Tanben s’a demanat que des deth pròpri Departament se redacte ua memòria d’accions entà avalorar era rèsta d’afectacions qu’a patit en sòn conjunt aguesta carretèra.

Eth sindic d’Aran, Carlos Barrera, a manifestat “eth Govèrn deth Conselh Generau d’Aran critique era demagogia deth conselhèr de Quate Lòcs d’UA-PSC, Francesc X. Boya, qu’ara reclame ara Generalitat de Catalonha e ath Conselh Generau ua accion urgenta dera carretèra locau d’accès ath pòble de Canejan.”

Barrera a hijut “semble que Boya age desbrembat que des der an 2007 ath 2011 eth siguec sindic d’Aran e deth 2007 ath 2010 era Generalitat de Catalonha siguec governada peth Tripartit, dilhèu s’alavetz en lòc de prométer naui traçats de carretères inviables d’executar auessen estat mès responsables entà melhorar er actuau traçat d’aguesta carretèra locau, ara non auríem de parlar d’aguestes afectacions”.

Arrebrembam qu’es damatges patidi en gèr deth 2014 en aguesta carretèra anèren a cargue deth pròpri Ajuntament de Canejan, mercés a ua subvencion dirècta dera Generalitat de Catalonha ar Ajuntament e damb finançament deth Conselh Generau d’Aran. Carlos Barrera, sindic d’Aran a soslinhat “açò ei trabalhar e es declaracions deth conselhèr Boya son demagogia”.