• Es inscripcions seràn daurides a compdar deth 4 de mai enquiath 7 de junh.

• Eth guanhador des 30 ores de Fotbòl Sala de Vielha jogarà contra ua equipa professionau.

Era VIII edicion des 30 ores de Fotbòl Sala de Vielha a iniciat eth sòn compde ath darrèr damb eth periòde d’inscripcions a compdar deth 4 de mai enquiath 7 de junh. Es 20 equipes que s’inscriuen lutaràn es pròplèus 20 e 21 de junh entà auçar-se damb ua Edicion qu’era organizacion prevé serà des mès disputades e igualades des darrèri ans.

Era estructura compde damb ua fasa iniciau de 4 grops damb 5 equipes en cadun entà dempús arribar a hèr rondes eliminatòries enquiara grana finau.

Un des atractius d’aguesta competicion, ath delà des 1500€ de prèmi entath prumèr classificat e es 750€ deth dusau, ei era opcion de poder disputar un partit amistós contra ua equipa dera Liga Nacionau de Fotbòl Sala (LNFS) eth mes d’agost en cas de guanhar es 30 ores.

Conjunts d’Aran, Catalonha e tanben de diuèrsi punts de França dejà an gaudit de bèra ua des anteriores edicions. Era avaloracion d’ans anteriors tostemp a estat fòrça positiva per part dera organizacion der eveniment.

Cafeteria Sandra- Casa Aragón, actuau campion, sajarà de ratificar eth títol, prètzhèt dificil pr’amor qu’eth nivèu des equipes va en aument an darrèr an, en tot confirmar ad aguest torneg coma un des mès prestigiosi a nivèu autonomic.

Es 30 ores de Fotbòl Sala compde damb era collaboracion deth Conselh Generau d’Aran e der Ajuntament de Vielha e Mijaran, entre d’auti patrocinadors.