Vielha, 26 de noveme de 2018.- Era delegada deth Govèrn en Catalonha, Teresa Cunillera, a realizat aué ua visita institucionau ena Val d’Aran a on a mantengut ua reünion de trabalh en Conselh Generau d’Aran damb eth sindic d’Aran, Carlos Barrera.

Ena reünion de trabalh tanben an participat es conselhèrs deth Govèrn d’Aran, bailes des principaus poblacions araneses e eth subdelegat deth Govèrn en Lhèida, José Crespín.

Ath finalizar era amassada eth sindic d’Aran, Carlos Barrera, expliquèc que pendent era reünion damb era delegada deth Govèrn an agut oportunitat de tractar aspèctes importants entara Val d’Aran coma era possible revision dera Constitucion Espanhòla e eth possible reconeishement dera realitat e singularitat dera Val d’Aran laguens Catalonha e Espanha.

En aguest sens, eth sindic d’Aran a manifestat qu’aguest ei eth gran moment dera Val d’Aran entà cercar era aliança deth Govèrn dera Generalitat que permete hèr es prepauses de reconeishement dera singularitat dera Val d’Aran, pr’amor qu’i a sufisent fondament de dret entad aguesta reconeishença per part der Estatut de Catalonha e dera pròpria Lei d’Aran entà hè’c. Barrera, didec qu’era delegada deth Govèrn s’a mostrat receptiva ad aguesta sollicitud pr’amor qu’ei pleaments coneishedora deth hèt diferenciau dera Val d’Aran.

Per d’auta part, tanben s’a tractat sus era problematica d’ua infrastructura tan importanta entà Aran coma ei era N-230, qu’eth sindic d’Aran n’a explicat qu’a informat ara delegada deth Govèrn sus es allegacions presentades peth Govèrn dera Generalitat, eth Conselh Generau d’Aran, era Deputacion de Lhèida e er Ajuntament de Vielha e Mijaran ara alternatiua presentada peth Ministèri de Foment de reforma dera carretèra N-230 des dera boca nòrd deth Tunèl de Vielha enquiara termièra damb França (en ua prumèra fasa des dera boca nòrd enquia Aubèrt). Eth sindic d’Aran a manifestat qu’a informat ara delegada deth Govèrn sus era importància d’aguesta via de comunicacion entà Aran, mès non a quinsevolh prètz, e que cau veir com se pòt equilibrar era melhora dera N-230 damb es interèssi d’Aran entà que aguesta carretèra non se convertisque en ua via de penetracion de transpòrt pesat a trauès deth Pirenèu centrau que pòt afectar grèvaments ara qualitat der entorn naturau e ara Val d’Aran coma destinacion toristica.

Fin finau, pendent era reünion tanben s’a tractat sus era regulacion dera circulacion de camions de transpòrt pesat pera Val d’Aran en epòca iuernau es dimenjades, qu’aurie de garantir qu’ena N-230 non auesse circulacion de transpòrt pesat des deth diuendres pera net enquiath dimenge as 20.00 ores entà protegir era seguretat vial des torismes que circulen per aguest tram. En aguest sens, eth sindic d’Aran, a afirmat qu’era delegada deth Govèrn s’a comprometut a coordinar aguesta regulacion damb eth Govèrn d’Aragon.