• Era sindica d’Aran visitèc eth passat deluns es colònies ta mainatges e mainades oncològics qu’organize era Associacion Contra eth Càncer ena Val d’Aran e s’amassèc damb eth president dera associacion a niveu estatau.

Deth 17 ath 23 de juhh s’an amiat a tèrme en Aubèrge era Garona de Salardú es colònies tà mainatges e mainades damb càncer que de hè 22 ans organize era Associacion Contra eth Càncer a trauès des sues delegacions en Lleida e Aran.

Aguestes colònies, orientades a milhorar era qualitat de vida des mainatges e mainades malautes de càncer, son pensades entà afavorir era su expression emocionau e milhorar era su autoestima e independéncia. Conden damb ua amplia varietat d’activitats d’òci relacionades damb eth entorn e era natura com era hipica, eth rafting o era acampada en un refugi de montanha, entre moltes autes.

Eth Conselh Generau d’Aran collabòre damb aguesta iniciatiua d’ençà deth sòn inici conscients der impacte positiu qu’an autrejat tant ara mainadèra com as sues familhes.

Era sindica d’Aran, Maria Vergés, visitaue deluns passat aguesti campaments a on s’amassèc damb eth president dera AECC en España, Ramon Reyes, damb qui podec compartir aguesta visita, a on s’emplacèren a seguir collaborant en aqueres iniciatives qu’era associacion, a trauès dera sua junta en Aran, amie a tèrme en nòste territòri.

En aguest sens, eth conselh Generau d’Aran ven de signar un acòrd de collaboracion damb era Associacion Contra eth Càncer en Lleida tà balhar supòrt as pacients e familhes ena Val d’Aran.

Vielha, 23 de junhsèga de 2022