34 joeni esportistes intègren es programes formatius deth CETEI Val d’Aran

Vielha, 7 de hereuèr de 2018.- Eth Centre de Tecnificacion d’Espòrts d’Iuèrn dera Val d’Aran (CETEI) desvolòpe damb succès era activitat esportiua ua sason mès.

Gràcies ath supòrt deth Conselh Generau d’Aran e dera Deputacion de Lhèida amassa damb Baqueira Beret e eth CSD (Consejo Superior de Deportes), es programes formatius d’esportistes de Pre-Tecnificacion ena Val d’Aran compden actuauments damb es següentes disciplines des espòrts de nhèu:

  • Esquí aupin : 21 esportistes.
  • Snowboard: 5 esportistes.
  • Freeride: 5 esportistes.
  • Freestyle: disciplina emergent, damb 3 esportistes en programa.

Damb un programa esportiu prepausat pes clubs aranesi, eth Centre de Tecnificacion dera Val d’Aran apòste, an darrèr an, per aguesta formacion ena cèrca de naui talents entàs espòrts de nhèu deth nòste país.

Eth Centre de Tecnificacion Esportiu d’Espòrts d’Iuèrn dera Val d’Aran, restacat ara Reiau Federacion Espanhòla d’Espòrts d’Iuèrn (RFEDI) e ara Federacion Catalana d’Espòrts d’Iuèrn (FCEH), a per objectiu ajudar ara progression de joenes promeses e velhar pera sua formacion integrau. Es esportistes seleccionadi arreceben formacion tecnica/esportiua e academica, ath delà d’un seguiment medicau/psicologic entà garantir un estat de salut adaptat entara practica esportiua e ua gessuda professionau de futur.

Eth vicesindic d’Aran e conselhèr d’espòrts, Luís Carlos Medina, a manifestat que “eth supòrt dera Deputacion de Lhèida, amassa damb eth dera rèsta d’institucions, arrespon as esfòrci que hè eth Conselh Generau d’Aran pes programes de Tecnificacion e Pre-Tecnificacion deth CETEI Val d’Aran, e represente un impuls entà que es joeni esportistes poguen alimentar es prumères equipes des diferentes modalitats esportiues e arribar a hèr concurrencia, coma en d’auti viatges, en uns Jòcs Olimpics e Paralimpics d’iuèrn”.

 

Comments are closed.