• Acòrd de collaboracion tà incrementar es contenguts en aranés enes mejans dera CCMA, atau coma tà refortilhar e prebotjar era preséncia dera Val d’Aran enes diferenti programes de TV3 e Catalunya Ràdio.

 

 

Eth sindic d’Aran, Carlos Barrera, e era vice presidenta dera CCMA, Núria Llorach, an signat aguest maitin un convèni de collaboracion entre es dues institucions qu’a coma objectiu incrementar era preséncia der aranés e des contenguts dera Val d’Aran enes mejans publics.

 

Era promocion dera lengua catalana e der aranés son objectius essenciaus des mejans dera Corporacion. Tant eth catalan coma er aranés son er element vertebrador de comunicacion, e es mejans majoritaris (era television, era ràdio e es nòsti mejans digitaus) an un gran papèr.

 

Ua des principaus missions dera CCMA ei contribuïr a normalizar er usatge dera lengua catalana e der aranés, entà assolidar era lengua tant orau coma escrita.

 

Era normalizacion lingüistica a dus aspèctes fonamentaus: prebotjar er usatge dera lengua en toti es airaus dera societat, e promòir-ne era qualitat, damb adeqüacion a cada situacion de comunicacion.

 

Es mejans dera CCMA assumissen eth compromís de contribuïr ara normalizacion der aranés e vòlen èster un esturment entà apropar-lo ara ciutadania e fomentar-ne, encara mès, eth coneishement e er usatge.

 

Er aranés a preséncia, des de hè 31 ans, en TV3 e Catalunya Ràdio, tant damb espacis de difusion ena Val d’Aran, en desconnexion, coma tanben entà tot eth territòri. Era prumèra emission en aranés en Catalunya Ràdio siguec eth 26 de març deth 1988 e era prumèra desconnexion en aranés de TV3 ena Val d’Aran siguec eth 20 de deseme deth 1990.

 

En aguesti moments, Catalonha Informacion emet cada dia dues ores de programacion en aranés en desconnexion entath territòri dera Val d’Aran:

 

• Ràdio: Es programes “Eth maitin d’Aran” e “Catalonha Informacion” en aranés son emissions regulars de ràdio en aguesta lengua en Catalunya, damb preséncia enes hilats sociaus, e tanben s’emet cada dimenjada un espaci brèu en aranés entà tot eth territòri catalan sus era actualitat dera val.

 

• Television: En cas de Television de Catalunya, eth canau 3/24 aufrís cada tarde de deluns a diuendres ua ròda informativa en aranés. E cada diuendres desconnexion ena Val d’Aran damb eth programa Noticies Comarques.

 

Era CCMA vò hèr naui passi ena promocion e difusion der aranés, e dera realitat d’Aran. Dar mès preséncia, apropar-la ara rèsta deth país.

 

Damb er acòrd que s’a signat aué, era Corporacion se compromet a

 

1. Refortilhar era preséncia de notícies dera Val d’Aran enes ròdes informatives en aranés deth 3/24

 

2. Promòir eth doblatge de programacion infantila en aranés

 

3. Prebotjarà era preséncia dera Val d’Aran en programes de divertiment e de caractèr divulgatiu en “prime time” de TV3. En aguest sens, aurà preséncia enes naues sasons de programes de gran exit coma “El Foraster” o “Joc de cartes”.

 

4. Crear espacis web especifics en aranés enes webs ccma.cat e 324.cat.

 

En aguest sens, eth portau ccma.cat recuelherà toti es contenguts que TV3 e Catalunya Ràdio produisquen en aranés; e eth portau 324.cat Incorporarà er aranés enes informacions referides especificaments ara Val d’Aran.

 

 

 

En paraules dera vice presidenta dera CCMA, Núria Llorach: “Des des mejans de comunicacion publica, auem er objectiu de prebotjar era lengua catalana e der aranés en toti es airaus dera societat, e promòir-ne era qualitat. TV3 e Catalunya Ràdio son grani esturments entà apropar er aranés ara ciutadania fomentar-ne er usatge e eth coneishement. Per açò, 30 ans dempús des prumères emissions, volem anar mès enlà entà apropar era realitat d’Aran en tot eth país: enes contenguts infantils, en programes de prime time, ena informacion nacionau o en internet”.

 

 

Pera sua part, eth sindic d’Aran, Carlos Barrera, a hijut: “Eth Conselh Generau d’Aran facilitarà tota era informacion de besonh ara CCMA tà que pogue amiar a tèrme es compromisi, ajudarà ara produccion as mejans dera CCMA entà per’mor de hèr possible eth doblatge de programacion infantila en aranés, condicionat as sues disponibilitats pressupostàries, e realizarà, se cau e a trauès dera sua pròpria unitat d’assessorament lingüistic, supòrt entara correccion e traduccion de tèxtes ar aranés”.

 

 

 

 

 

Vielha, 8 d’abriu de 2019