Acòrd entara collaboracion transfronterèra en matèria de fauna sauvatja e espècies cinegetiques

Generalitat de Catalonha, Conselh Generau d’Aran, Govèrn d’Andorra e Govèrn de França an signat un acòrd entà oficializar era collaboracion entà melhorar era eficiéncia des accions en espaci transfronterèr en aguest airau

Vielha, 2 de mai de 2019.- Era Generalitat de Catalonha, eth Conselh Generau d’Aran, eth Govèrn d’Andorra e eth Govèrn de França melhoraràn era collaboracion entara gestion coordinada en matèria de fauna sauvatja e espècies cinegetiques en espaci transfronterèr deth Pirenèu, damb er objectiu d’aumentar era eficacitat des servicis e accions comunes. Ei eth prumèr còp que s’amie a tèrme ua gestion coordinada de totes es administracions competentes en fauna sauvatja e activitats cinegetiques en massís deth Pirenèu.

Er acòrd ac an signat era secretària de Miei ambient e Sostenibilitat deth Departament de Territòri e Sostenibilitat, Marta Subirà; eth director generau des Agents Ruraus deth Departament d’Agricultura Ramaderia, Pesca e Alimentacion, Marc Costa; eth sindic d’Aran, Carlos Barrera; eth director generau deth Burèu Nacionau de Caça e Fauna Sauvatja dera Republica de França, Olivier Thibault; eth director generau de Miei ambient e Sostenibilitat deth Govèrn d’Andorra, Marc Rossell, e eth director deth Còs de Banders deth Govèrn d’Andorra, Miquel Rossell.

En acte der acòrd tanben i an participat eth conselhèr de Territòri, José Antonio Boya, eth conselhèr d’Agricultura, Ramaderia e Medi Naturau, José Enrique Arró, e eth tecnic deth departament de miei ambient deth Conselh Generau d’Aran, Ivan Afonso.

Pendent era ròda de premsa posteriora ara signatura, es representants deth Govèrn catalan an destacat eth bon entendement entre es quate administracions entà formalizar ua collaboracion transfronterèra que ja existie a nivèu practic e que damb era signatura der acòrd passe a èster oficiau e ratifique eth gran trabalh realizat enes darrèri ans.

Eth sindic d’Aran, Carlos Barrera a exprimit era satisfaccion de totes es parts en arténher un acòrd qu’assolide eth futur e permet auer es madeishi critèris entà trabalhar en ua madeisha linha.

Per part deth Govèrn d’Andorra, Marc Rossell a remercat qu’es accions qu’es quate administracions implicades desvoloparàn laguens aguesti airaus de trabalh permeteràn melhorar er escambi d’informacion, elaboracion d’estrategies e intervencions comunes, er escambi de materiaus e practiques entà melhorar era efectivitat des servicis e era melhora dera capacitacion deth personau implicat mejançant era realizacion conjunta e coordinada de formacion pròpria des sòns airaus de competéncia.

Enes darrèri ans era Generalitat, eth Govèrn d’Aran, d’Andorra e França an trabalhat amassa en matèria de medi naturau, en tot impulsar accions coordinades. En concrèt, ua collaboracion activa entre eth Burèu Nacionau de Caça e Fauna Sauvatja dera Republica de França (ONCFS) e eth Còs d’Agents Ruraus deth DARP entara realizacion de servicis termierèrs en tèmes de medi naturau, caça e fauna sauvatja. Tanben entre eth Conselh Generau d’Aran e era Generalitat de Catalonha a trauès dera Comission Bilaterau Govèrn dera Generalitat-Conselh Generau d’Aran, e entre eth Govèrn d’Andorra e era Generalitat en projèctes ambientaus transfronterèrs.

Er acòrd se configure coma un estrument entara melhora d’aguesta cooperacion en diuèrsi airaus de trabalh:

  • Era planificacion, eth seguiment e era gestion dera fauna sauvatja e des espècies cinegetiques.
  • Es accions tecniques de supòrt ara gestion dera fauna sauvatja e des espècies cinegetiques.
  • Era vigilància, era inspeccion e eth contraròtle dera fauna sauvatja e espècies cinegetiques e des sòns abitats.
  • Era formacion deth personau implicat en aguesti prètzhèts.

Es accions qu’es quate administracions implicades desvoloparàn laguens aguesti airaus de trabalh sòn entà melhorar er escambi d’informacion, elaboracion d’estrategies e intervencions, er escambi de materiaus e practiques entà melhorar era efectivitat des servicis e era melhora dera capacitacion deth personau implicat mejançant era realizacion conjunta e coordinada de formacion pròpria des sòns airaus de competéncia. Aguest acòrd a ua vigéncia de quate ans.

Comission de seguiment entà concretar prepauses

Entà per’mor de hèr eth seguiment e contraròtle dera execucion d’aguest acòrd, se constituís ua Comission de seguiment formada per dus representants de cada part, que s’amassarà aumens annauments. Eth grop s’encargarà de definir es accions a realizar en marc d’aguest acòrd, deth contraròtle e eth seguiment, e deth calendari de trabalh, atau coma de coordinar er escambi d’informacion, entre d’auti.

Info: Departament de Territori i Sostenibilitat Generalitat de Catalonha

Comments are closed.