Eth sindic d’Aran, Carlos Barrera, e eth cap de Cultura e Patrimòni d’Aran, Jèp de Montoya, an recebut aué a ua cinquantea d’alumnes dera Escòla Superiora d’Arquitectura dera Universitat Rovira i Virgili.

Dejà ei eth tresau an qu’aguesti alumnes an escuelhut es glèises dera Val d’Aran entà hèr es trebalhs de fin de carrèra.

En paraules deth sindic d’Aran, Carlos Barrera, “aguesti trebalhs son ua immesurabla basa de documentacion de donades entà, damb temps, anar trebalhant ena aquera idia de cercar era maximala catalogacion dera Val d’Aran coma Patrimòni dera Umanitat”.

Jèp de Montoya, cap de Cultura e Patrimòni d’Aran, a hijut que “damb d’auti projèctes coma es vestigis patrimoniaus o era restauracion e estudi des relòtges des campanaus, van hilant ua trama multidisciplinar entà arténher aguest objectiu”.

Josep Lluís Guinovart, coordinador dera Escòla, a manifestat as alumnes era importància que se le da ath trebalh per part deth Govèrn aranés e qu’an d’èster conscients qu’estan contribuint des dera origena a cercar era realitat de qu’era Val d’Aran sigue un referent ena conservacion e exposicion deth sòn patrimòni.

Per part dera tecnic de Patrimòni deth Conselh Generau, Elisa Ros, a hèt ua explicacion dera glèisa de Sant Miquèu de Vielha, e a acompanhat a cada grop d’alumnes as diferentes glèises e capeles sus es que trebalharàn.

Aguestes visites as glèises e dispausar des madeishes ei gracies ara disposicion per part des Mossens dera Val d’Aran e deth sòn Archiprèste, Mossen Pere Balagué, en particular.