• Eth govèrn d’Aran a amiat a tèrme un acte de reconeishement des sòns esportistes olimpics tà méter en valor er esfòrç e dedicacion que Rafael Mombiedro, Andrés Ribera, José Moga, Eva Moga, Xavi Ubeira e Alex Puente an amiat a tèrme pendent es sues trajectòries personaus e professionaus, en tot plaçar ara Val d’Aran coma un territòri de referéncia en mon der espòrt de nhèu e esdevier grani referents entara nòsta joenessa

Eth govèrn deth Conselh Generau d’Aran a amiat a tèrme aguesta tarde en Palai d’Espòrts de Vielha un acte de reconeishement dedicat as esportistes olimpics deth territòri:

• Rafael Mombiedro que participèc enes Jòcs Olimpics de 1952 en Oslo
• Andrés Ribera que participèc enes Jòcs Olimpics de 1952 en Oslo e 1956 en Cortina d’Ampezzo
• José Moga que participèc enes Jòcs Olimpics de 1956 en Cortina d’Ampezzo
• Eva Moga que participèc enes Jòcs Olimpics de 1988 en Calgary
• Xavi Ubeira que participèc enes Jòcs Olimpics des ans 1992 en Albertville e 1994 en Lillerhammer
• Alex Puente que participèc enes Jòcs Olimpics de 2014 en Sochi

Er acte a compdat damb era preséncia, entre d’auti, dera sindica d’Aran, Maria Vergés, eth president dera RFEDI, May Peus, eth director gerent de Baqueira Beret, Alex Barés, atau coma es pròpris esportistes olimpics deth nòste territòri, es sues familhes, amics e persones qu’an volut assistir entad aguest acte de reconeishement as sues trajectòries.

“tath govèrn d’Aran ère un deute pendent eth d’amiar a tèrme un acte d’aguest tipe entà méter en valor er esfòrç e dedicacion qu’aguesti sies esportistes an amiat a tèrme pendent es sues trajectòries personaus e professionaus, en tot plaçar ara Val d’Aran coma un territòri de referéncia en mon der espòrt de nhèu e esdevier grani referents entara nòsta joenessa” afirmaue era sindica d’Aran.

Eth Conselh Generau d’Aran a autrejat a cada un des nòsti olimpics ua placa en reconeishement pera sua labor en favor der espòrt aranés e, autant eth president deth Comitat Olimpic Espanhòu (COE), Alejandro Blanco, coma eth president deth Conselh Supèrior d’Espòrts (CSD), José Manuel Franco, que non an podut assistir per motius d’agenda, les an adreçat ues paraules a trauès d’un video projectat en Palai d’Espòrts entà toti es assistents.

Atau madeish era sindica d’Aran asseguraue que “eth govèrn d’Aran desvolope diuèrses accions entà promocionar er espòrt e facilitar es trajectòries des nòsti professionaus, coma es convènis de patrocini, es bèques entà joeni esportistes o d’autes politiques entath foment e creishement d’aguest airau ena Val d’Aran enes que dejà portam fòrça temps trabalhant, entà facilitar eth  desvolopament des carrères des grani esportistes damb es que compdam en nòste territòri” e higie que “ua des nòstes prioritats ei era d’arténher eth traspàs complèt dera competéncia en aguest airau, entà poder gestionar de forma agil e propèra un airau tant important tath país coma aguest”.