• Eth Conselh Generau d’Aran collabòre, un an mès, damb aguesta corsa qu’enguan acuelherà mès de 3.700 corredors repartits entre es quate distancies, en tot convertir-se ena carrera damb major nombre de corredors inscrits entre totes es sues distancies en Espanha
Era Val d’Aran acuelherà, pendent es dies 7 e 10 de junhsèga, era dusau edicion dera Val d’Aran by UTMB®, qu’enguan se convertís en eveniment de trail running damb major nombre d’inscrits que s’amiarà a tèrme en Espanha dempús de superar en mès de 600 inscripcions es 3.116 corredors e corredores de 62 nacionalitats der an passat.
Mès de 3.700 corredors procedents de mès de 70 païsi coma França, UK, Portugal, USA, Argentina, Belgica, Polonia, Hong Kong, Japon, Egipte o Vietnam se daràn cita en un des eveniments de trail mès importanti de tota Euròpa.
“Deth govèrn deth Conselh Generau d’Aran ençà collaboram damb es organizadors d’aguest gran eveniment esportiu pr’amor que pensam que supause ua oportunitat unica entà plaçar eth nòste territòri ena elit deth trail running mondiau, atau coma demòstre eth gran exit d’inscripcions d’aguesta dusau edicion” afirmaue era sindica d’Aran, Maria Vergés.
Era celebracion d’aguest eveniment tan prestigiós e coneishut a nivèu mondiau supause un gran impuls toristic entath país a principis deth mes de junhsèga, ua accion de desestacionalizacion plan importanta entà Aran.
Es persones interessades pòden trapar tota era informacion ena web oficiau dera corsa: https://www.aranbyutmb.com/
Vielha, 1 de junhsèga de 2022