Era estacion dera Val d’Aran, Baqueira Beret, a arribat a un acòrd damb La Molina, gràcies ath supòrt dera Reiau Federacion Espanhòla Espòrts d’Iuèrn (RFEDI), entà organizar era finau dera Copa deth Mon de Snowboard Cross (SBX) FIS 2016 ena quau participaràn es melhors riders dera modalitat a on destaque er integrant dera equipa RFEDI Lucas Eguibar, actuau campion deth “Globo de Cristal”.
Era estacion aranesa s’a metut enguan ath deuant d’ua Copa deth Mon que serà era prumèra en disputar-se ena estacion es dies 19 e 20 de març de 2016.
De quèrra a dreta: Israel Planas, tecnician dera equipa dera RFEDI de SBX, Lucas Eguibar, membre dera equipa de SBX dera RFEDI, Anna Díaz, conselhèra de Torisme e Desvolopament Econòmic d’Aran, Luis Carlos Medina, vicesindic d’Aran e conselhèr d’Espòrts d’Aran, Regino Hernández, membre dera equipa de SBX dera RFEDI e Laro Herrero, membre dera equipa de SBX dera RFEDI.
En un iuèrn de meteorologia dificila entà grana part des estacions d’esquí d’Euròpa, es centres d’iuèrn d’Espanha que hèn part dera Associacion Toristica d’Estacions d’Esquí e Montanha (ATUDEM) son en plea collaboracion en toti es fronts e eth dera competicion ei un des principaus. En aguest sens, Espanha a dejà ua grana tradicion ena organizacion d’eveniments esportius dera Federacion Internacionau d’Esquí (FIS).
En Snowboard i a un important istoric en quau s’acumulen 8 edicions dera Copa deth Mon (Sierra Nevada 2005 e 2008 e La Molina a compdar deth 2008 enquiath 2015) ath delà d’uns Campionats deth Mon FIS en La Molina 2011 e ath calendari des Campionats deth Mon Snowboard e Freestyle FIS en Sierra Nevada entara pròplèu sason 2017.
Deuant aguest important istoric organizatiu e ua equipa de SBX dera RFEDI fòrça potent que compde damb eth guanhador dera Copa deth Mon 2014-2015, Lucas Eguibar, ath delà deth càntabre Laro Herrero e der andalós Regino Hernández es espòrts d’iuèrn non podien pèrder era celebracion d’ua Copa deth Mon dera especialitat ena peninsula.
La Molina tostemp a destacat peth sòn domeni en montatge d’eveniments esportius mès era abséncia de nheuades aguest iuèrn a motivat er acòrd damb Baqueira Beret era quau a arrecebut entrades de nòrd. Era estacion aranesa s’a metut deuant enguan d’ua Copa deth Mon que serà era prumèra en disputar-se ena estacion es dies 19 (classificatòries) e 20 (finaus) de març de 2016.
Autant La Molina coma Sierra Nevada an aufrit era sua experiéncia entà dar un còp de man ena preparacion deth circuit que se traçarà ena naua pista que pòrte eth nòm de Boardercross estreada justaments aguest iuèrn e plaçada ena zòna deth Blanhiblar en airau de Beret.
Un tecnician dera FIS dejà a visitat era zòna e ath costat deth responsable RFEDI e d’equipes d’ambdues estacions entà determinar es caracteristiques deth circuit en quau se preven lutes apassionantes peth que serà era finau d’aguesta sason 2015-2016.
Carlos Barrera, sindic d’Aran, a manifestat “èm contenti e motivadi damb aguesta pròva qu’acuelherà era Val d’Aran e Baqueira Beret. Trabalharam pr’amor que sigue un èxit e demostraram ath mon eth potenciau deth nòste país”.
Aguesta pròva se retransmet eth dirècte per tot eth mon damb un potenciau d’audiéncia milionari qu’en Espanha emeteràn en dirècte Teledeporte de TVE, Espòrts 3 de Tv3 e Eurosport.
S’està definint era composicion deth Comitat Organizador deth quau formaràn part era pròpria estacion, eth Conselh Superior d’Espòrts, era RFEDI, amassa damb era Federacion Catalana Espòrts d’Iuèrn (FCEH), eth Conselh Generau d’Aran e er ajuntament deth Naut Aran e eth Conselh Catalan der Espòrt, entre d’auti.
Vielha, 8 de hereuèr de 2016
Conselh Generau d’Aran: Núria Sanjuan