Ara seguida vos detalham es resultats des competicions enes quaus participèren es diferentes equipes d’esquí aupin deth Club Aranés d’Espòrts d’Iuern (CAEI) era passada dimenjada.
Era equipa d’U12 se desplacèc tara Cerdanya entà disputar dues competicions, en La Masella eth dissabte, 17 de març, e en Pas de la Casa eth dimenge, 18 de març.
En eth “25 Cargol de Neu” disputat en La Masella, Daniela Chalbaud, artenhec ua fòrça bona dusau plaça. Ena prumèra manja acabèc tresau en tot cométer un error ena part baisha, ena dusau gessec a per totes e guanhèc era manja, hèt que li permetec remontar ua posicion e acabar dusau. Era aranesa, Ares Figueruelo, acabèc 8aua, era tanben aranesa, Lua Brunet 16aua e Paz Vidaor 18aua, en tot èster eth CAEI ath costat deth LMCE es unics clubs que plaçauen a 4 corredores entre es 20 prumères.
Es gojats non aueren un bon dia en La Masella, 5 d’eri non poderen acabar era prumèra manja. Matthew Zoido siguec eth melhor en tot acabar eth 22au.
Eth dimenge en “Memorial Chichu Tauler”, Daniela Chalbaud tornaue a arténher un pòdium en tot acabar tresau ena combi Race. Era carrèra consistie en un “SKI cross” enlaçat damb un tram de GS. Era aranesa, Lua Brunet, tanben se plaçaue en top 10.
En gojats, er aranés Marc Ubeira acabèc setau, Alex Gubert 13au e Vicente Munilla 19au, en tot èster cincau des de prumèr an 2007.
Es U16 se desplacèren ara estacion francesa dera Mongie entà participar en “Grand Prix La Mongie U16”, en tot obtier un dusau e un tresau lòc es òmes, a cargue der aranés Samuel Beso e Tomy Marcet e un tresau e un quatau lòc per part des hemnes a cargue de Lucía Cortiñas e Patricia Escolar.
Per un aute costat, era equipa de Masters disputèc en Formigal eth “Campionat d’Espanha de Masters II Memorial Carlos García “Chapi””, a on se trobèren ues condicions meteorologiques fòrça variables e irregularas, en tot provocar qu’es corredors s’auessen d’adaptar ara variabilitat dera nhèu e ara visibilitat, aspècte que non condicionèc era espectacularitat des baishades e eth foncionament dera competicion.
Eth grop Mastèr deth CAEI artenhec uns grani resultats damb 12 pòdiums en totau e 6 guanhadors absoluts enes sues respectives categories.
Cau soslinhar eth papèr de Luís Izquierdo, guanhador ena categoria M3 en SG, eth SL e era combinada, en tot barrar eth campionat damb ua dusau posicion en GS.
Carmen Puertas (1a SL e 3aua en SG) e Rafa Ruano (2au en SL e 4au en SG) guanhèren era combinada enes categories F3 e M4 respectivaments.
Soslinhar tanben es pòdiums de Pep Fernández (3au en SG), Sergio Chalbaud (3au en GS) e Xavi Riba (2au en SG).
Vielha, 21 de març de 2018
Conselh Generau d’Aran: Núria Sanjuan
Hònt e Fotos: CAEI