Era Agència de Residus de Catalunya (ARC) a presentat cinc projèctes entara XIII edicion deth Prèmi Europèu dera Prevencion de Residus, un d’eri eth dera Escòla Sant Ròc de Bossòst ena categoria “Institucions escolares”.

Eth centre escolar aranés a presentat eth projècte comunicatiu multilinüe Mission 5R redusim es montanhes de residus! Se tracte d’ua accion transversau damb tota era comunitat educativa, qu’emplegue es cinc lengües que s’ensenhen en centre. S’a creat eth Festival de Musica 5R, damb composicions des alumnes de Cicle Superior, coma eth Rap des 5R en aranés, entà sensibilizar sus es valors sostenibles.

En catalan s’a desvolopat er èish cronologic des residus ena Val d’Aran a compdar d’un trabalh de recèrca d’informacion. En castelhan s’a trabalhat era poesia e s’a compausat un poèma musicat e de tematica ambientau titulat “Nuestro reto”. En anglés s’a creat un tèxte descriptiu sus animaus marins en perilh pr’amor des residus plastics e s’a elaborat un murau grafic sus objèctes dera vida vidanta que pòrten plastic amagat. En francés s’a aprenut coma a evolucionat era generacion de residus en comparacion damb era epòca des pairs e mairs-sénhers der escolantat.

Enguan, eraXIV Setmana Europea dera Prevencion de Residus se celebrarà deth 19 ath 27 de novembe. Er EWWR ei ua iniciativa coordinada pera ARC que se celebra en Catalunya der an 2008 ençà e qu’a recebut eth supòrt dera Comission Europea a trauès de dus projèctes LIFE. Actuaument a un comitat director, damb diuèrses entitats publiques, entre es quaus figure eth Comitat de Regions dera Union Europea. Er objectiu ei prebotjar era implantacion d’accions de sensibilizacion entara prevencion des residus e era gestion sostenible des recorsi ath long d’ua setmana der an.