Era Val d’Aran acuelherà era gessuda d’ua des etapes deth Tour de França 2016

Eth passat dia 21 de seteme, eth Conselh Generau d’Aran formalizèc, eth nòm dera Val d’Aran, era sua participacion ena gessuda dera etapa deth Tour de França 2016: Val d’Aran- Andòrra

TOUR DE FRANÇAEth cap de Gabinet deth sindic d’Aran, Pau Perdices, eth director deth Tour de França, Christian Prudhomme, eth conselhèr de Relacions Institucionaus d’Aran damb er Estat Francés, Jose Antonio Boya, e un des organizadors deth Tour.

 

Eth Govèrn aranés a mantengut aguest mes de seteme dues reünions damb era organizacion deth Tour de França, ena qu’an estat presents eth director deth Tour, Christian Prudhomme, eth vicesindic d’Aran e conselhèr d’Espòrts, Luis Carlos Medina, era conselhèra de Torisme e Desvolopament Economic d’Aran, Anna Díaz, eth conselhèr de Relacions Institucionaus d’Aran damb er Estat Francés, Jose Antonio Boya, e eth cap de Gabinet deth sindic d’Aran, Pau Perdices.

Eth director deth Tour de França, Christian Prudhomme, avalorèc fòrça positivaments era experiéncia dera finau d’etapa en Plan de Beret, eth 13 de junhsèga deth 2006, e per açò prepausèc qu’era Val d’Aran acuelhesse era gessuda dera etapa deth Tour de França 2016, eth dia 10 de junhsèga: Val d’Aran- Andòrra.

Eth Conselh Generau d’Aran a arribat a un acòrd de collaboracion economica damb er Ajuntament de Vielha e Mijaran e er Ajuntament de Naut Aran entà cofinançar amassa damb eth Conselh Generau d’Aran e era Secretaria Generau der Espòrt dera Generalitat de Catalonha eth còst d’aguest importantíssim eveniment esportiu, un des qu’a sense dobte ua major repercussion mediatica mondiau.

En paraules deth sindic d’Aran, Carlos Barrera, “eth Conselh Generau d’Aran apòste, amassa damb era rèsta d’Administracions implicades en aguest inici d’etapa coma ua grana oportunitat entà mostrar era capacitat d’acuelhuda en infrastructures toristiques qu’a Aran e tanben mostrar es valors païsatgistics que configuren era natura e es pòbles aranesi”.

Des deth Conselh Generau tanben se contunharà cercant supòrt economic e estructurau en tot compdar damb era Deputacion de Lhèida e damb eth Servici Catalan de Transit. Aguestes negociacions s’amiaràn a tèrme per part deth sindic d’Aran, Carlos Barrera.

Comments are closed.