Era Val d’Aran compde damb un nau circuit de BTT plaçat en Plan de Beret

ruta-altura-beretPlan de Beret. Foto: COPOS BIKE

Es amants dera BTT an ua grana noticia, donques qu’a compdar d’aguest ostiu, era Val d’Aran a ampliat eth centre BTT damb un nau circuit plaçat en Plan de Beret. Eth recorregut cònste de 5 kms de longitud e supause un desnivèu acumulat de 170 mètres.

Aguesta naua installacion a estat dessenhada e creada peth Conselh Generau d’Aran e per Baqueira-Beret. Eth recorregut ei mercat de forma permanenta damb garròts de husta, s’inicie ena cafeteria de Beret, puge cap ara cabana des Gabachos e dempús passe a trauès der arriu Noguera Palharesa peth dessús d’un pònt.

“Des dera Val d’Aran èm fòrça capinauti d’auer bastit aguest circuit de BTT en Beret, donques qu’ei un nau atractiu entàs amants d’aguest espòrt, qu’ei destinat a entrenaments mès que quinsevolh pòt utilizà’c”, comente era conselhèra de Torisme, Comèrç e Consum, Anna Diaz.

Aguest circuit se junh ara aperada “Rota 28” que passe entre es localitats de Vielha, Vilac, Aubert e Es Bòrdes, d’uns 10 kms de longitud, qu’ei practicaments planèra, e tanben pensada entà favorir qu’eth torisme familhau s’apròpe ara Val d’Aran a practicar aguest espòrt en augment coma ei era BTT.

“Er ampliament deth centre BTT Val d’Aran damb aguestes rotes mos da mès prestigi e de mès en mès es visitants assòcien era nòsta destinacion toristica damb era practica esportiua, en aguest cas de BTT”, ahigie Diaz.

Cau arrebrembar qu’era Val d’Aran dispause de 28 rotes de BTT peth territòri, ena sua majoria daurides e de nivèu facil o fòrça facil. Ath delà en bòsc de Baricauba (municipi de Vielha e Mijaran), compde damb eth circuit de Mountain Bike Park de descenuda de BTT des de 2012.

Copos Bike ei eth punt d’acuèlh deth centre BTT Val d’Aran deth Conselh Generau d’Aran, centre omologat BTT en Catalonha. En establiment se pòt trobar tota sòrta d’informacion sus es 28 rotes que dispause eth centre BTT, atau coma materiau de besonh entà realizar-les e conselhs basics entath recorregut. Atau madeish i a disponibles desparièrs punts d’informacion a on pòden dar-se tanben informacion des centres BTT, repartidi per desparières localitats dera Val d’Aran.

Comments are closed.