• Aguestes accions an estat finançades per Institut d’Estudis Ilerdencs dera Deputacion de Lhèida.

Eth Conselh Generau d’Aran a desvolopat un conjunt d’accions destinades a fornir era promocion culturau, era difusion des musèus e er impuls dera lengua aranesa pendent er exercici 2026. Aguesta iniciativa s’encastre laguens d’un convèni subvencionat per Institut d’Estudis Ilerdencs dera Deputacion de Lhèida, que permeterà desvolopar diuèrses actuacions estrategiques entath territòri.

En encastre des musèus, s’a milhorat era retolacion dera façada deth Musèu des Hèstes deth Huec, atau coma era elaboracion de documentacion e naua cartelheria exteriora.

En çò que tanh ara promocion dera lengua aranesa, s’a metut en marcha ua campanha especifica, acompanhada dera produccion dera creacion de materiau grafic (pegasolets, punts de libre o calendaris).

En airau d’activitats culturaus, s’a dat supòrt ara participacion d’entitats e grops aranesi/occitans ena celebracion dera Hèsta d’Aran, Amics deth Burat Arredalh, Còlha Santa Maria de Mijaran, Rambalh e Sarabat. Tanben s’a impulsat eth programa TerSon dera Hèsta d’Aran, damb eth concors musicau Aranvision, organizat pera Associacion Culturau Arania Val d’Aran, fomentant er usatge dera lengua amassa damb era creacion musicau en aranés.

Damb aguest conjunt d’accions, eth Conselh Generau d’Aran reafirme eth sòn compromís damb era preservacion e promocion deth patrimòni culturau e lingüistic dera Val d’Aran, atau coma damb era dinamizacion dera vida culturau deth territòri.

Vielha, 16 d’abriu de 2026