Eth Conselh Generau d’Aran regule era remassada de misharnons e evite damatges en bòsc

Damb era naua ordenança deth mes de mai que regule era recuelhuda de misharnons ena Val d’Aran, vesins d’Aran, proprietaris de dusaus residéncies e gent que pernocti en establiments toristics, poden arrecuélher misharnons enes bòsqui sense cap còst.

ceps

Des deth mes de mai, mes en quau entrèc en vigor era naua ordenança que regule era remassada de misharnons ena Val d’Aran, i a agut ua denóncia per part des agents de Medi Ambient deth Conselh Generau d’Aran damb era collaboracion des Mossos d’Esquadra.

Era denoncia siguec pr’amor qu’eth denonciat remassèc misharnons sense era corresponenta autorizacion. Se decomisèren diuèrsi quilòs de rovelhons, ceps e rossinhòls.

En paraules deth sindic d’Aran, Carlos Barrera, “aguesta mesura non a càp afan recaptatori donques qu’ei totauments gratuïta, e tanpòc limite era quantitat de misharnons que se pòden arrecuélher.”

Eth Conselh Generau a expedit uns talonaris as sòns Ajuntaments e lotjaments otelèrs que permete a residents, proprietaris de dusaus residéncies e gent que pernocti en establiments toristics dera Val d’Aran, poder arrecuélher misharnons en es bòsqui sense cap còst.

Eth reglament, cossent damb era nòrma forestau catalana, aplique sancions que van des de leugèrs, grèus, enquia fòrça grèus en casi de reïncidéncia.

Eth conselhèr d’Agricultura, Ramaderia e Medi Naturau d’Aran, José E. Arró, a informat qu’”es agents de Medi Ambient deth Conselh Generau d’Aran son es encargadi de garantir que se complisque era naua nòrma. En aguest sens i a ua collaboracion de coordinacion damb eth còs de Mossos d’Esquadra e Guardia Civil a efèctes de contraròtles de compliment dera madeisha.”

SENHALIZACION_misharnons 20 def

Ath delà, eth Conselh a installat 42 panèus de senhalizacion enes pistes forestaus entà informar sus era proïbicion d’arrecuélher misharnons en aranés, catalan, castelhan e francés.

Comments are closed.