Recuperacion deth camin ath saut de Molières e era val de Molières

Eth Departament d’Agricultura, Ramaderia e Miei Naturau deth C.G.A., a amiat a tèrme diuèrses accions entara recuperacion deth camin ath saut de Molières e ena val de Molières, laguens eth projècte Life Limno Pirineus.

 IMG_1446

 

Life Limno Pirineus, ei un projècte destinat ara melhora der estat de conservacion d’espècies e abitats aquatics d’interès europèu dera nauta montanha des Pirenèus. Entà amiar a tèrme es desparières accions, es Servicis Tecnics deth Conselh Generau d’Aran, realizèren ua cartografia detalhada des abitats e es comunitats que formen es turbéres, entà avalorar eth sòn estat de conservacion e es possibles menaces damb era fin de protegir e recuperar es espècies uniques des landes umidites existentes en aguesta zòna.

Es mesures de recuperacion an consistit en desviar eth camin pera zòna periferica dera turbéra en tot profitar eth traçat d’ua vielha pista, senhalitzan explicitaments eth sòn recorregut e en tot proïbir era circulacion de veïculs, sonque es autorizadi.

Ena reconstruccion deth camin, s’an plaçat pèires entà delimitar eth camin corrècte, s’an substituït es senhalizacions vielhes e s’an plaçat naui pannèus informatius de senhalizacion, s’an retirat arbes queigudi, s’an installat quate passarèles de husta tractada (quauques d’eres damb parabanda) entà facilitar eth pas de persones, s’a limpiat eth guardader deth saut de Molières e bastidi naui passi d’aigua, ath delà de plaçar ua caseta de husta damb tampa entà dus contienedors de lordèra.

Entath conselhèr d’Agricultura, Ramaderia e Miei Naturau deth Conselh Generau d’Aran, José Enrique Arró: “Projèctes coma eth Life Limno Pirineus, ajuden a valorar er esfòrç uman e economic que hè eth Conselh Generau d’Aran entà recuperar e mantier era esséncia naturau dera Val d’Aran. Eth respècte que des de hè ans demòstre eth Govèrn deth C.G.A., Damb accions coma era der estanh de Vilac o era reconstruccion deth canau d’adaigament d’Aubèrt, tà destacar sonque dus exemples, confirmen que contunham de transméter eth messatge positiu que permetec era reconeishença dera Val d’Aran coma Biosphere Destination autrejat pera UNESCO”.

IMG_1463IMG_4736IMG_1450

Comments are closed.