• Aguesta comission se realize cada an abans dera sason d’iuèrn entà per’mor de coordinar es accions ena C-28.

Aué dimars, dia 10 de noveme, s’a celebrat en Conselh Generau d’Aran era comission de viabilitat dera C-28 presidida peth sindic d’Aran, Carlos Barrera, e a on an assistit era conselhèra de Torisme e Desvolopament Economic d’Aran, Anna Díaz, eth director de Montanha de Baqueira Beret, Jordi Cardona, eth delegat territoriau dera Direccion Generau d’Infraestructures e Mobilitat Terrestre (DGIMT), Jordi Benet, eth baile de Naut Aran, César Ruiz-Canela, eth baile de Vielha e Mijaran, Juan A. Serrano, atau coma representants des còssi de seguretat e emergéncia des Mossos d’Esquadra, Pompièrs d’Aran e deth Centre de Lauegi dera Val d’Aran.

Aguesta comission se realize cada an abans dera sason d’iuèrn entà per’mor de coordinar es accions ena C-28.

Eth Govèrn aranés a demanat ara DGIMT priorizar segons es besonhs es òbres previstes en dues fasas per part deth Departament de Territòri e Sostenibilitat dera Generalitat de Catalonha. Era prumèra fasa consistís ena constuccion de proteccions e viseres en tram entre Baqueira e era corba de Tonhòn ara fin de melhorar era comunicacion dera Val d’Aran damb eth Pallars, via Pòrt dera Bonaigua, e dempús contunhar damb era dusau fasa prevista qu’a coma objècte refortilhar era seguretat d’accès a Beret (corba de Maria Casteràs) e pera banda deth Pallars enquiath Pòrt dera Bonaigua, açò permeterà ua major garantia ar accès ara Peülla e ath Cap deth Pòrt peth Pallars.

Aguestes inversions auràn un còst d’apuprètz quate milions d’èuros e se desvoloparàn ena primauera/ostiu deth 2016 segons a informat eth delegat territoriau dera Direccion Generau d’Infraestructures e Mobilitat Terrestre (DGIMT), Jordi Benet.

Tanben s’a arribat ar acòrd d’installar ua webcam ena corva de Maria Casteràs entà entà per’mor de melhorar era prediccion de lauegi e era viabilitat dera carretèra C-28 ath sòn pas pera Pleta de Baqueira, e se mantierà era webcam en Proèro entà auer donades precises e periodiques dera distribucion dera nhèu e era activitat de lauegi en sector deth Pòrt dera Bonaigua e poder melhorar era viabilitat dera carretèra C-28.

Aguestes webcams són estacions leugères alimentades per bateries e panèus solars qu’envien fotografies panoramiques cada 30 menutes e permet as tecnicians deth Conselh Generau deth Centre de Lauegi dera Val d’Aran auer donades precises e periodiques dera distribucion dera nhèu e era activitat de lauegi en un sector.

Aguesta tecnologia, que dejà s’implantèc era passada sason d’iuèrn damb ua webcam en Proèro, a estat desvolopada pera empresa d’engenharia aranesa Arantec- Smarty Planet e hè part dera sua ampla gamma d’estacions remotes aplicades a diuèrsi encastres de monitorizacion deth miei fisic.

Ath delà, eth Centre de Lauegi dera Val d’Aran deth Conselh Generau d’Aran desvoloparà un an mès eth sistèma de desencadenament preventiu de lauegi a trauèrs der aparelh Daisy Bell, que provòque explosions controtlades entà descargar excès de nhèu en zònes damb risc de lauegi. Eth mecanisme s’aplique en Pòrt dera Bonaigua (2.072 mètres) entà facilitar era dubertura dera carretèra C-28 e ena carretèra d’accès entath Plan de Beret (C–142b).

Eth responsable deth Centre, Jordi Gavaldà, assegure qu’eth sistèma “se desvolope damb èxit” e explique qu’eth Daisy Bell se transpòrte en elicoptèr e un viatge plaçat apròp dera superfícia dera nhèu provòque ua explosion d’idrogèn e oxigèn en tot provocar un laueg. Atau, se previen es lauegi de montanha ena via de comunicacion damb eth Pallars e ene carretèra d’accès a Beret.

Era Val d’Aran ei un des territòris pionèrs der Estat ena utilizacion d’aguest mecanisme, qu’a permetut daurir era C-28 “damb mès assiduitat e, sustot, damb mès seguretat”, segontes Gavaldà. Damb aguesta mesura, se sage de mantier es carretères dubèrtes eth maximon de temps possible pendent er iuèrn, atau coma garantir-ne era seguretat des sòns usatgèrs.

Aguest sistèma s’aplique per miei d’un acòrd de collaboracion entre eth Conselh Generau e eth Departament de Territòri e Sostenibilitat dera Generalitat entà facilitar era dubertura lèu immediata des vies afectades dempús des nheuades.

Eth sindic d’Aran, Carlos Barrera, a manifestat “era equipa de Govèrn deth Conselh Generau d’Aran seguís trabalhant damb er objectiu de garantir ath maximal era prevencion e deteccion de risqui naturaus deth territòri aranés. Aguesta informacion fonamentau entà accions de prevencion e alèrta deuant es risqui a estat enfortida damb era incorporacion d’un tecnician de Proteccion Civiu arraïtz des traspassi artenhudes peth Conselh Generau d’Aran ena Comission Bilaterau Generalitat de Catalonha- Conselh Generau d’Aran”.

Barrera a hijut “aguest tipe d’accions són imprescindibles entà garantir era seguretat enes nòstes carretères pendent er iuèrn”.