Er Ajuntament de Vielha e Mijaran ei proprietari deth campanau pr’amor deth privilègi concedit en 1505 peth rei Ferran II, eth Catolic, as òmes de Vielha entara defensa deth pòble.
Eth Bisbat d’Urgell ei titular dera glèisa parroquiau de Sant Miquèu de Vielha.
Eth sindic d’Aran, Carlos Barrera, er alcalde Vielha e Mijaran, Àlex Moga, e eth rector dera parròquia de Sant Miquèu de Vielha, archiprèste dera Val d’Aran e representant deth Bisbat d’Urgell, mossen Pere Balaguer, an signat un convèni entara execucion deth projècte de reabilitacion deth campanau dera glèisa de Sant Miquèu de Vielha.
Eth dia 7 de seteme de 2013 era tor-campanau de Sant Miquèu de Vielha resultèc maumetuda pera accion d’un lampit. Entà subsanar es desperfèctes provocadi, es tecnics deth Conselh Generau d’Aran redactèren d’immediat eth projècte de reabilitacion qu’ascendís a 54.457,71€, eth quau siguec aprovat pera Comission Assessora der Auviatge dera Val d’Aran en session de 15 de noveme de 2013.
En paraules de Carlos Barrera, sindic d’Aran “eth conjunt que conformen era glèisa e eth campanau de Sant Miquèu de Vielha, ei un des monuments mès subergessents e de major valor simbolic deth nòste patrimòni artistic e istoric, ath delà se trape incoat coma Ben Culturau d’Interés Nacionau.”
Eth Conselh Generau d’Aran aportarà 14.993€ que se dividiràn en dues parts:
a) un ajut economic entath finançament deth projècte nomentat per un import maxim de 11.000€ des sòns hons pròpis, damb cargue ara partida pressupostària 01.336.762.00 deth pressupòst deth Conselh Generau d’Aran entar exercici 2014.
b) Ua aportacion en espècie de lòsa vielha entara reabilitacion deth campanau dera glèisa de Vielha per un impòrt de 3.993,00 €.
En tot tractar-se d’un monument que gaudís de protecion coma Ben Culturau d’Interés Nacionau, era direccion e eth contròtle dera òbra anarà a cargue des tecnics deth Conselh Generau d’Aran assignats ar Airau de Patrimòni Culturau.
Er Ajuntament de Vielha e Mijaran finançarà eth restant entara execucion deth projècte
Eth Bisbat d’Urgell facilitarà es trabalhs e er accés en campanau.
Es òbres d’execucion deth projècte an ua duracion prevista de 2 mesi.