Convocatòria entad ingrès de 350 pompièrs volontaris dera Generalitat de Catalonha

21 d’aguestes places apartien ara Unitat Foncionau dera Val d’Aran

Vielha, 27 de junhsèga de 2016.- Eth Departament d’Interior dera Generalitat de Catalonha convòque eth procès selectiu entà provedir 350 places entath còs de pompièrs volontaris dera Generalitat. Pòden optar ara convocatòria es persones majors de 18 ans qu’agen eth títol de graduat/a en educacion segondària obligatòria o equivalenta, o siguen en condicions d’obtié’c e que non patisquen cap malautia ne discapacitacion fisica, psiquica o sensoriau. Atau madeish, ei obligatòri que residisquen a 15 quilomètres, coma maxim, de radi deth parc ath que se vòlen adscríuer.

Eth termini de presentacion de sollicituds comencèc eth dimars, 26 de junhsèga e finalizarà eth pròplèu dia 23 de seteme. Es persones participants ena convocatòria auràn de superar es diuèrses pròves de coneishences, aptitud fisica, avaloracion psicologica e entrevista personau e reconeishement medicau, entre d’auti. Tanben auràn de realizar e superar un cors de formacion ena Escòla de Pompièrs e Proteccion Civiu deth ISPC, e superar era fasa de practiques.

Es aspirants que supèren totes es pròves des diuèrses fases deth procès e qu’amassen es requisits e condicions requerides, seràn nomentadi membres dera seccion activa deth còs de pompièrs volontaris dera Generalitat de Catalonha, e seràn distribuïdi entre es 75 parcs de pompièrs volontaris dera Direccion Generau de Prevencion d’Incendis e Sauvaments (DGPEIS).

Eth còs de pompièrs volontaris ei format per aqueres persones que, damb vocación benefica sociau, presten d’ua manèra altruïsta es foncions laguens dera estructura dera DGPEIS. Es sòns prètzhèts ei eth d’actuar en lòc deth sinistre, atau coma realizar servicis de prevencion e d’auti non urgents.

Tota era informacion en aguest hilat

http://interior.gencat.cat/ca/arees_dactuacio/bombers/convocatories/Bombers-Voluntaris/Bombers_voluntaris/

file

Comments are closed.