Vielha, 23 d’agost de 2018.- Era glèisa dera Purificacion de Maria de Bossòst acuelherà eth concèrt entà barrar eth Romanic Musicau d’ostiu.

Eth darrèr concèrt deth cicle serà aguest pròplèu diuendres dia 24 d’agost a compdar des 22:00 ores, damb era clausura deth cicle de visites concèrt gratuït, Romanic Musicau que s’a celebrat pendent tot eth mes d’agost enes glèises dera Val d’Aran.

Aguest viatge eth quartet Prysma, flaüta, violin, viòla e violonceu, serà er encargat de realizar eth concèrt que compdarà damb un repertòri de W.A. Mozart, de G. Rossini, G. Bizet e G. Puccini. Era explicacion deth bastiment anarà a cargue dera istoriana Elisa Ros.

Un aspècte a destacar ei eth hèt d’auer incorporat a joeni musicians aranesi coma “teloners” des musicians professionaus.

20 ans de Romanic Musicau ena Val d’Aran

Era activitat comence damb un audiovisuau comentat pera istoriana aranesa Elisa Ros sus era glèisa a on se celèbre e finalize damb un concèrt de musica classica.

Eth cicle Romanic Musicau ei patrocinat peth Conselh Generau d’Aran e Foment Torisme Val d’Aran, damb era collaboracion deth Talher de Musica Maite Fernández, era Escòla de Musica Val d’Aran, era Escòla Tschaikovski Balh e Musica e er Arxiprestat dera Val d’Aran. Aguest cicle gratuït refortilhe eth programa de visites guidades ath auviatge qu’amie a tèrme eth Conselh Generau d’Aran.

Enguan se celèbre eth 20 anniversari deth Romanic Musicau e, coma novetat s’a organizat ua visita guidada ath Campanau de Vilac eth 3 d’agost e ath Ecomusèu Çò de Joanchiquet de Vilamòs eth 10 d’agost.

Eth cicle ei ua iniciatiua deth Conselh Generau d’Aran e Foment Torisme Val d’Aran, damb era collaboracion der Arxiprestat dera Val d’Aran e dirigit per Idees i Projectes.