Vielha, 21 de març de 2019.- Eth “Prácticum ODISSEU” aufrís era possibilitat a estudiants universitaris de realizar practiques universitàries remunerades e de mastèr en enterpreses de territòris ruraus.
Es estudiants interessadi s’i poderàn inscríuer enquiath 12 de mai.
Eth programa tanben se dirigís ath collectiu empresariau deth mon rurau deth país, que poderà corbir era sua aufèrta de practiques gràcies as candidats deth “Prácticum ODISSEU”. Eth dessenh deth programa permet qu’aguestes enterpreses poguen accedir a candidats damb formacion superiora. Un hèt que les ajude a incrementar era sua competitivitat empresariau.
Eth projècte ODISSEU ei impulsat pera Direccion Generau de Desvolopament Rurau deth Departament d’Agricultura, Ramaderia, Pesca e Alimentacion (DARP) e era Direccion Generau de Joenessa deth Departament d’Ahèrs Sociaus e Familhes dera Generalitat de Catalonha, a compdar d’ua iniciatiua conjunta dera Fondacion deth Mon Rurau e dera Associacion d’Iniciatiues Ruraus de Catalonha, damb era collaboracion des Grops d’Accion Locau Leader de Catalonha e eth hilat de professionaus de joenessa.
ODISSEU a er objectiu iniciau de fomentar eth retorn enes zònes ruraus d’origina a joeni formadi, a trauès deth contacte e era implicacion des principaus agents que subervien ena sua transicion: es universitats e centres de formacion, es enterpreses locaus, es institucions e administracions qu’intervien enes politiques de desvolopament rurau, d’emplec e de creacion d’enterpreses e de joenessa.
Es estudiants universitaris interessadi ena realizacion des practiques se pòden meter en contacte damb era Oficina de Joenessa deth Conselh Generau d’Aran en: http://www.joenessa.org/contacte/
Es enterpreses interessades se pòden inscriuer enquiath dia 17 d’abriu. Informacion en: http://www.odisseujove.cat/passos-a-seguir-per-a-les-entitats-beneficiaries/
Tota era informacion sus es practiques en:
Portau web deth programa: http://www.odisseujove.cat/es-ajudes-ath-practicum-odisseu/
Portau web damb es aufèrtes publicades: http://www.odisseujove.cat/aufèrtes-de-practiques/
Inscripcion ath bulletin d’estudiantes: http://eepurl.Com/ge6urL
Prumèr bulletin electronic entà estudiants: https://mailchi.mp/De2447781514/practicum_odisseu_1