• Dempús de diuèrses gestions amiades a tèrme e des cambis enes protocòls existents, se poderan realizar pròves PCR en madeish laboratòri der Espitau en casi d’urgéncia atau coma pròves serologiques a trauès d’analisi de sang tà conéisher eth grad d’immunitat deuant deth COVID-19, tostemp jos critèri medic

Pendent tota era crisi sanitària provocada peth COVID-19, s’an realizat pròves PCR (que detècten era infeccion deth COVID-19) a trauès des airaus d’atencion primària e d’urgéncies der Espitau Val d’Aran en tot respectar es protocòls establidi pes autoritats sanitàries. Aguestes mòstres se portauen a analizar en laboratòri der espitau Arnau de Vilanova pr’amor qu’en Aran non se compdaue damb es recorsi de besonh.

Un viatge superada era fasa critica dera pandèmia e dempús de diuèrses gestions amiades pes responsables dera sanitat aranesa, aguestes pròves poderan realizar-se en Aran. Per çò que hè as pròves PCR, se realizaran en casi d’urgéncia, quan eth pacient age de besonh d’assisténcia quirurgica. Atau madeish, es pròves serologiques que detècten era preséncia d’anticòssi deth COVID-19, se poderan tanben amiar a tèrme en laboratòri der Espitau. Andues pròves se realizaran tostemp jos critèri medic.

Actuaument, se dispòse d’un nombre limitat de pròves PCR, pr’amor d’aquerò se haran en casi d’urgéncia, era rèsta se seguiran enviant entath laboratòri der espitau Arnau de Vilanova. Cau rebrembar qu’era PCR ei era pròva considerada de màger fiabilitat diagnostica entà detectar era malautia aguda.  Per un aute costat, es pròves serologiques permeten era possibilitat de detectar tant era malautia activa coma era malautia pasada e resòlta e era possibla immunitat, e a compdar d’ara, jos era prescripcion deth mètge de capçalèra, se realizaran a trauès dera tecnica ELISA que detècten anticòssi totaus e qu’ei 100% fiabla.

Maria Vergés, conselhèra d’Igualtat, Salut e Benèster deth Conselh Generau d’Aran manifestaue que “gràcies as gestions realizades poderam, per un costat, auer mès informacion e de forma mès rapida, causa que mos ajudarà a reaccionar damb agilitat, e per aute, préner es mesures abientes de proteccion des professionaus e dera poblacion en generau”.

Es indicacions entà cadua d’aguestes pròves an estat definides e consensuades damb eth Servei de Vigilància Epidemiològica deth Departament de Salut dera Generalitat de Catalunya e toti es professionaus sanitaris deth Conselh Generau d’Aran an recebut era informacion ath respècte.