Des inscriti, 150 son participaires internacionaus provenenti de païsi coma Norvègia, Suècia, Finlàndia, Rússia, Estats Units de Nòrd America, Mexic, Soïssa, França e Itàlia
Vielha, 1 de hereuèr de 2019.- Quan manquen dus dies entara 40au edicion dera Marxa Beret, era carrèra populara d’esquí de hons mès important der estat espanhòu, que se celèbre eth pròplèu dimenge 3 de hereuèr en Plan de Beret, ja son 800 es participaires inscriti online çò que represente un recòrd en çò que tanh a inscripcions prealables ara pròva e hè a pensar en ua grana participacion eth pròplèu dimenge.
Des inscriti, 150 son participaires internacionaus provenenti de païsi coma Norvègia, Suècia, Finlàndia, Rússia, Estats Units de Nòrd America, Mexic, Soïssa, França e Itàlia.
Eth dissabte 2 de hereuèr as 10.00 ores se disputarà eth Sprint Salomon qu’aguesta edicion serà tanben Campionat d’Espanha de Sprint ena modalitat de tecnica liura.
Eth dimenge, 3 de hereuèr, as 10.00 ores, se disputarà era 40au Marxa Beret, damb un circuit de 10 Km ena zòna de Beret e Orri; de 21Km ena zòna de Beret, Orri e Montgarri e fin finau eth circuit de 42km ena zòna de Beret, Orri, Montgarri e direccion Marimanha. Es organizadors dera pròva son pendenti dera prevision meteorologica entà decidir es circuits definitius dera carrèra.
Era 40au Marxa Beret, qu’ei ua des pròves d’esquí nordic mès assolidades que se realizen en territòri nacionau, ei inscrita en circuit de Marches Populares (Populara Cross-Country Race) deth calendari FIS (Federacion Internacionau d’Esquí), serà enguan Campionat d’Espanha de Longa distància e hè part dera Copa Espanha Loteries d’Esquí de hons dera RFEDI e puntuable entath circuit de Copa Catalana.
Eth vicesindic d’Aran e director dera Marxa Beret, César Ruiz Canela, expliquèc qu’eth bon ritme d’inscripcions online hè a pensar qu’era 40au edicion dera Marxa Beret pòt èster istorica e ua des mès multitudinàries des darrèri ans.
Era aranesa Marta Cester, guanhadora est an passat deth Sprint Salomon e dera Marxa Beret ena distància de 42 Km, es fraies María e Lydia Iglesias Barés, e Pablo e Marta Moreno an formalizat era sua inscripcion ena 40au Marxa Beret, coma tanben ac a hèt Sadurní Betriu, guanhador est an passat ena distància de 42 Km.
Era Marxa Beret ei organizada peth Conselh Generau d’Aran, Baqueira Beret e er Ajuntament de Naut Aran. Compde damb era collaboracion de: Associacion Volentaris d’Aran, Foment Torisme Val d’Aran, Deputacion de Lhèida, Pompièrs d’Aran, Aran Salut, Mossos d’Esquadra, INS d’Aran, ath delà dera Reau Federacion Espanhòla d’Espòrts d’Iuèrn (RFEDI), era Federacion Catalana d’Espòrts d’Iuèrn (FCEH), era Secretària Generau der Espòrt dera Generalitat e es desparièrs patrocinadors.
Es inscripcions presenciaus se realizaràn en Pòliesportiu de Salardú (Casa d’Acuelhuda) eth dissabte, 2 de hereuèr, a on s’aurà de presentar era documentacion corresponenta e recuélher eth dorsau, documentacion dera carrèra e es presents des organizadors e patrocinadors, de 09.00 ores enquias 21.00 ores. Ena madeisha casa d’acuelhuda se harà era presentacion oficiau dera 40au Marxa Beret eth dissabte as 19.00h.
Tota era informacion dera 40au Marxa Beret a www.marxaberet.com.
