Era 40au Marxa Beret supère es 900 participaires

150 participaires internacionaus procedenti de Norvègia, Suècia, Finlàndia, Soïssa, Rússia, Estats Units, Mexic, França e Itàlia an concorrut damb eth rèste de hondistes en Beret

Vielha, 3 de hereuèr de 2019.- Mès de 900 hondistes de totes es edats an participat aué ena 40au edicion dera Marxa Beret disputada en Plan de Beret. Era edicion d’enguan dera Marxa Beret a compdat damb era participacion de 150 hondistes internacionaus procedenti de païsi coma Norvègia, Suècia, Finlàndia, Soïssa, Rússia, Estats Units, Mexic, França e Itàlia, qu’an gaudit dera grana hèsta dera pròva degana der esquí de hons en Espanha, inscrita en circuit de Marches Populares (Populara Cross-Country Race) deth calendari FIS (Federacion Internacionau d’esquí), enguan Campionat d’Espanha de Longa distància, e que hè part dera Copa Espanha Loteries d’Esquí de hons dera RFEDI e puntuable entath circuit de Copa Catalana.

Era Marxa Beret, s’a disputat en un circuit de 10 km, 21 km e 42 km ena zòna de Beret e Orri, jos ues condicions meteorologiques de heired, vent e nhèu qu’a obligat as organizadors a remercar eth traçat enquia pòqui moments abans de començar era pròva.

Eth vicesindic d’Aran e director dera Marxa Beret, César Ruiz Canela, a destacat “eth trabalh realizat pera equipa d’organizacion dera Marxa, de toti es collaboradors que la an hèt posible enes 40 edicions, e sustot eth trabalh des Volontaris d’Aran, sense desbrembar as federacions e patrocinadores dera Marxa Beret“.

Era Marxa Beret ei organizat peth Conselh Generau d’Aran, Baqueira Beret e er Ajuntament de Naut Aran. Compde damb era collaboracion de: Associacion Volentaris d’Aran, Foment Torisme Val d’Aran, Deputacion de Lhèida, Pompièrs d’Aran, Aran Salut, Mossos d’Esquadra, INS d’Aran, ath delà dera Reau Federacion Espanhòla d’Espòrts d’Iuèrn (RFEDI), era Federacion Catalana d’Espòrts d’Iuèrn (FCEH), era secretària generau der Esport dera Generalitat e es diuèrsi patrocinadors.

En çò que tanh ara participacion des esportistes aranesi cau destacar era victòria de Marta Cester ena categoria senior femenina en 42 km, María Iglesias guanhadora en 21 km, Lydia Iglesias 2au ena madeisha distància, e Marta Moreno, guanhadora en 10 km. En aguest sens tant Marta Cester coma María Iglesias s’an proclamat campiones d’Espanha de Longa distància.

Ager se disputèc eth tradicionau Sprint Salomon Campionat d’Espanha de Sprint ena modalitat de tecnica liura en que participèren 130 hondistes e disputat tanben jos ua intensa nheuada. Pendent es dus dies de competicion s’an superat es mil participaires ena 40au edicion dera Marxa Beret.