Era aucupacion otelèra artenh un 80% ena Val d’Aran enes prumèrs dies deth pònt

Era conselhèra de Torisme e Desvolopament Economic Anna Díaz, avalore positivaments es dades d’aucupacion, que s’an plaçat en torn ath 80% pendent era prumèra part deth pònt dera Puríssima ena Val d’Aran.

 

Eth sindic d’Aran, Carlos Barrera, destaque que deuant ua grana afluéncia de visitants, es estructures des servicis d’emergéncies dera Val d’Aran an foncionat damb totau normalitat e seguretat.

 

d48942f96e03b6ea5027fb614cb7d798

 

Eth sector toristic d’Aran percep simptòmes de recuperacion economica.

Era prevision de Baqueira Beret ei véner 40.000 forfaits enquiath dimars.

Anna Díaz, conselhèra de Torisme e Desvolopament Economic deth Conselh Generau d’Aran, a mostrat era sua satisfaccion pes donades d’aucupacion toristica ena Val d’Aran pendent es prumèrs dies dera sason d’iuèrn, en tot coïncidir damb eth pònt dera Puríssima. Sense auer es donades definitives, Anna Díaz, a avalorat positivaments eth hèt que pendent er inici d’aguesta dimenjada longa, era Val d’Aran age artenhut un 80% d’aucupacion otelèra.

“Se somam es sojorns en otèls e es visitants de dusau residéncia, mos trobam damb entre 22.000 e 25.000 persones apuprètz, que genèren un fòrt impacte economic non solaments enes otèls, mès tanben ath conjunt d’establiments dera Val d’Aran coma es comèrci, restaurants e bars, o supermercats”, didec Díaz, en tot ahíger que “tanben mos cau compdar damb era gent que pernocte en d’auti lòcs, coma era Val de Boí per exemple, mès vien a passar eth dia ena Val d’Aran”.

Maugrat tractar-se de donades parciaus, era conselhèra de Torisme tanben a proporcionat eth numero aproximat de venta de forfaits de Baqueira Beret, qu’era pròpria estacion d’esquí calcule en 40.000 forfaits venudi pendent eth pònt.

 

c095ef252ff3e3a0882615761cb407a0

 

Pera sua part eth sindic d’Aran, Carlos Barrera, a remercat que “en dies coma aguesti, damb ua grana afluéncia de visitants ena Val de Aran, es estructures des servicis d’emergéncies, tant sanitaris coma de Pompièrs dera Val d’Aran, an foncionat damb totau normalitat e seguretat pendent aguesti dies”, atau coma eth trafic ara ora d’accedir ara estacion d’esquí.

Era situacion de plea normalitat e es bones donades dera prumèra part deth pònt, hèn a pensar qu’aguest se barrarà damb chifres positives entàs sectors economics, toristics e otelèrs dera Val d’Aran.

6ef758afae866573f3781aa372932d9b

Comments are closed.