Gastropirenèus ei ua accion organizada damb er objectiu de dar protagonisme e méter en valor era codina, es productes e es professionaus deth sector dera restauracion de totes es comarques pirenenques de Catalonha. Des dera Val d’Aran enquiara Garrotxa, era iniciatiua a estat concebuda de forma transversau, entà amassar eth legat codinari de toti aguesti territòris.

Mejançant es jornades se preten estimular era innovacion, promòir era cultura alimentària, arrecuélher e difóner eth coneishement de productors, elaboradors e codinèrs. Er objectiu ei melhorar era competitivitat des professionaus e es empreses deth sector enogastronòmic deth nòste Pirenèu.

Parallelament, laguens de Gastropirenèus i aurà mòstra e degustacion de productes, demostracion d’elaboracion de plats dera codina des Pirenèus, presentacion de naui plats e productes, escambi d’idèes, debat e reflexion e sessions de codina en dirècte.

Gastronomia aranesa en GastroPirenèus

Era gastronomia aranesa aurà un papèr destacat enes jornades, damb era demostracion de codina en dirècte des plats d’iuèrn deth Restaurant Casa Irene d’Arties, a cargue deth xef aranés, Andreu Vidal.

Cristina Madruga, deth Conselh Generau d’Aran, presentarà eth dimars 15 era Marca de Garantia Productes dera Val d’Aran.

Laguens des actes de celebracion der an de Catalonha coma Region Europèa dera Gastronomia 2016, Gastropirenèus ei punt d’amassada des professionaus des sectors toristics e gastronomics. Eth torisme e es sòns servicis associadi fonamentaus entà fixar er “assentament” dera poblacion e garantir e melhorar era qualitat de vida des abitants des zònes de montanha.

Vielha, 12 de noveme de 2016

Conselh Generau d’Aran: Núria Sanjuan

Hònt: FTVA