Era Comission d’Urbanisme dera Val d’Aran facilite era creacion deth Musèu dera Casa deth Haro en Les

  • Era Comission d’Urbanisme d’Aran a aprovat aué era modificacion deth planejament entà hèr possible era implantacion d’aguest equipament divulgatiu e culturau en dues parcèlles municipaus

  • Lum verda definitiva tanben ara ampliacion deth camping Verneda de Vielha e Mijaran damb 13 unitats d’acampada mès e eth cambi de plaçament de ues autes entà minimizar eth risc d’inundacions e melhorar era seguretat des usatgèrs e usatgères

Era Comission d’Urbanisme dera Val d’Aran, presidida pera sindica d’Aran, Maria Vergés, e eth secretari d’Agenda Urbana e Territòri, Agustí Serra, a aprovat aué ua modificacion de planejament que permeterà era creacion deth Musèu dera Casa der Haro en Les, un centre d’interpretacion que meterà en valor es Hèstes deth Huec en territòri. Atau madeish, era Comission a dat eth darrèr vist-e-platz ara ampliacion deth camping Verneda, plaçat en municipi de Vielha e Mijaran.

Eth Musèu se plaçarà ena actuau bastissa dera Casa der Haro deth pòble de Les, que se reabilite entà ampliar-lo ara parcèla deth costat. Andues parcèles son de proprietat municipau.

Era Comission a aprovat era modificacion des Nòrmes de planejament dera Val d’Aran en aguest emplaçament de Les entà qualificar es dues parcèlles coma equipament comunitari damb usatge socioculturau. Era creacion d’aguest centre d’interpretacion des hèstes deth huec ei finançada peth Departament de Cultura dera Generalitat.

En cas deth municipi de Vielha e Mijaran, era comission dejà auie aprovat eth Plan especiau entara ampliacion deth camping Verneda eth passat mes d’abriu, mès n’auie supeditat era sua entrada en vigor ara presentacion d’un tèxte rehèt, que permeterà era ampliacion.

Eth camping Verneda, plaçat en Pònt d’Arròs ath long d’andús costats der arriu Garona e entre eth camin reiau e era N-230, obtenguec era autorizacion de dubertura per part der Ajuntament en 1986 e actuaument compde damb 182 unitats d’acampada (23 fixes e 159 mobils), damb capacitat entà 546 usatgèrs.

Se dividís en tres airaus, un ath marge dret der arriu a on se placen es bastisses principaus e un parcatge, eth dusau, en marge esquèr der arriu, a on se placen es unitats d’acampada e un auta bastissa de servicis, e un tresau airau damb zòna esportiva e espacis liures. Es installacions existentes se trapen parciaument en zòna inundable.

Eth Plan prepause ampliar era superfícia deth camping en 30.640 m2 de terren, en contunhitat damb eth tresau airau, a andús costats deth camin reiau. Açò permeterà dispausar de mès espaci entà redistribuir es unitats fixes e mobils e es edificacions per tot er airau deth camping, aluenhant-se dera zòna inundable e garantint atau era seguretat des persones usatgères. Era melhora des installacions tanben darà compliment as requisits d’un camping de dusau categoria.

Atau, se passe de 182 unitats d’acampada a 195 (75 fixes e 120 mobils), un totau de 13 addicionaus. Ath delà, se cambiarà eth plaçament de 35 unitats d’acampada existent plaçades en zòna inundable e, coma conseqüéncia, s’ampliarà era zòna verda parallèla ar arriu. Tanben s’ampliaràn es actuaus bastisses de servicis e se’n crearàn de naues, un ath cant deth camp de fotbòl e un aute ath sud deth camin reiau. Es espacis liures s’incrementen en 26.240m2. Eth Plan establís que se retiraràn es unitats d’acampada plaçades en zònes inundables en un maxim de 5 ans, e qu’eth conjunt des trabalhs contemplats se desvoloparà en un maxim de 10 ans.

Comments are closed.