• Era sindica d’Aran, Maria Vergés, e era conselhèra de Cultura, Natàlia Garriga, an presidit aguesta tarde en Barcelona er acte d’autrejament d’aguest guerdon concedit de manèra ex aequo ara jornalista Lissa Escala e eth lingüista Xavier Lamuela, coma mòstra de reconeishement ara sua trajectòria ena promocion, defensa e normalizacion der aranés

Era conselhèra de Cultura dera Generalitat de Catalunya, Natàlia Garriga, e era sindica d’Aran, Maria Vergés, an presidit er acte de liurament deth 7au Prèmi Robèrt Lafont, qu’era Generalitat a autrejat ex aequo a Lissa Escala e Xavier Lamuela pera sua trajectòria ena promocion, estudi e defensa der aranés.

Ena sua intervencion, era sindica d’Aran a destacat era “importància de reconéisher eth trabalh de persones coma Lissa Escala e Xavier Lamuela, qu’enes sòns ambits an destat peth sòn rigor e compromís pera lengua, atau coma pera sua militància activa ena defensa e promocion der aranés” e higie que: “mos trapam en un moment en qu’autant era militància pera lengua, coma er hèt de compdar damb es recorsi de besonh ei primordiau entà evitar era desaparicion dera nòsta lengua pròpria, que se trape en ua situacion fòrça delicada”.

Era jornalista Lissa Escala a estat pionèra dera ràdio en aranés, damb eth prumèr programa en aranés en Ràdio Aran, prètzhèt qu’a desvolopat ath long de mès de 30 ans damb programes coma Meddia Aranés, en Catalonha Informacion, contribusint a un modèl d’emplec e de prestigi sociau der aranés. Tanben destaque eth sòn compromis civic ena promocion dera lengua pròpria d’Aran er impuls d’iniciatives sociaus tant importantes entath territòri coma era Corsa Aran per sa Lengua, que reivindique era defensa e promocion der aranés.

Peth sòn costat, eth lingüista e sociolingüista, doctorat en filologia romanica, Xavier Lamuela, a estat professor enes Universitats de Tolosa de Lengadòc, Girona, Autònoma de Barcelona, Lleida e Manchester, formèc part dera Comission que redactèc es Normes Ortografiques der Aranés en 1982, presidic eth Conselh dera Lengua Occitana (fondat en 1996) e actuauments ei membre deth Conselh Consultatiu der Aranés, creat peth Conselh Generau d’Aran en 2021 tar assessorament en matèria lingüistica dera maxima institucion aranesa. Lamuela ei autor d’un extens e rigorós trabalh academic damb transferéncia sociau, de diuèrsi estudis e libres sus era lengua, atau un coma defensor dera occitanitat der aranés mès tanben deth besonh qu’aguest sigue considerat coma primordiau e preferent ena politica lingüistica dera Generalitat coma lengua tanben oficiau deth territòri catalan, e qu’a d’èster dotada de toti es mieis de besonh tara sua perviuença.