Era Òbra Sociau “la Caixa” renauís eth programa informatic NEURON UP deth Centre Aucupacionau ADDA

Vielha, 12 d’octobre de 2018.- Eth director d’airau de negòci de CaixaBank enes Pirenèus e era Val d’Aran, Jaume Casal, e eth director deth burèu dera Caixa en Vielha, Ruben Castells, acompanhadi dera conselhèra de Salut e Benéster d’Aran, Anna Díaz, an visitat eth Centre Aucupacionau ADDA (Associacion Discapacitats dera Val d’Aran), a on an signat eth renauiment deth programa informatic NEURON UP ara que era Òbra Sociau “La Caixa” i destine 2.000 €.

Eth programa NEURON UP ei ua plataforma informatica d’estimulacion cognitiva e neuroreabilitacion damb mès de 6.000 exercicis a on-line e imprimibles, estruments e simulacion dera vida reau, que ja hè dus ans era Òbra Sociau “La Caixa” cedic a ADDA entà desvolopar prètzhèts jornalièrs d’exercicis per part des usatgèrs deth centre.

 

Pendent era visita an profitat tanben entà veir eth renauiment dera codina deth centre aucupacionau qu’eth Conselh Generau d’Aran mejançant eth convèni de collaboracion damb era Òbra Sociau “La Caixa” installèc eth mes de mai passat. Eth renauiment dera codina s’includís laguens deth programa de melhores des installacions deth centre que tanben compdèc damb eth cambiament de persianes enes aules e era melhora dera gessuda ar exterior dera terrassa. En aguestes melhores s’i destinèren 12.886 €.

Era conselhèra de Salut e Benéster d’Aran, Anna Díaz, a arregraït era collaboracion dera Òbra Sociau “La Caixa” enes projèctes deth Centre Aucupacionau ADDA e enes sues activitats. Era conselhèra a arrebrembat qu’es aportacions de volontariat tanben son fòrça importants ara ora d’ajudar en foncionament deth centre que depen deth Conselh Generau d’Aran.

Pera sua part, Jaume Casal, a explicat qu’es 2.000 € se destinen ara mantenença e actualizacion dera plataforma NEURON UP atau coma ara rèsta de projèctes d’ADDA. Eth director d’airau de negòci de CaixaBank enes Pirenèus e era Val d’Aran a explicat que des dera Òbra Sociau “La Caixa” son tostemp atenti as prepauses qu’arriben deth territòri entà encastrar-les en sòn projècte e dar un servici de retorn as usatgèrs e as sues familhes.

Fin finau, Dolors Berdié, directora d’ADDA a explicat qu’eth programa NEURON UP facilite fòrça eth trabalh cognitiu e de participacion des usatgèrs deth centre. Berdié a manifestat qu’era aportacion economica dera Òbra Sociau “La Caixa” la destinaràn tanben ath renauiment d’equipes informatiques e ara mantenença deth uart urban deth centre.

Cau arrebrembar qu’era collaboracion dera Òbra Sociau “La Caixa” e eth Centre Aucupacionau ADDA se manten a compdar de hè ans e a servit entre d’autes causes entà finançar diferentes activitats deth centre, atau coma es visites realizades ar elipòrt de Vielha o ath centre de contròl deth Tunèl de Vielha.

Era conselhèra e es representants dera Òbra Sociau “La Caixa” an profitat era visita entà felicitar as gojats e gojates d’ADDA que recentaments an participat enes Jòcs Special Olimpics 2018 en Andòrra e La Seu d’Urgell a on an artenhut 10 medalhes, quate d’aur, tres d’argent e tres de bronze, enes diferentes pròves esportiues des Jòcs.

 

Comments are closed.