• Pera tarde a inaugurat, amassa damb eth delegat deth rector de Politica Lingüistica, Joan Santanach eth cicle d’activitats “Maig Aranès” qu’organize era UB ath torn dera lengua e cultura araneses

• Aguesta a estat era prumèra amassada institucionau entre era sindica d’Aran, Maria Vergés e eth rector dera UB, Joan Guàrdia, qu’an profitat entà tractar des actuaus e futures collaboracions

Era sindica d’Aran, Maria Vergés, s’a amassat aué damb eth rector dera UB, Joan Guàrdia ena prumèra trobada institucionau entre andús òrgans.

Pendent era amassada an tractat diferenti ahèrs restacadi damb er ensenhament e coneishement dera lengua aranesa que servisquen de pònt entre Aran e Barcelona e daurir atau naues vies de trabalh entre era maxima institucion aranesa, a trauès deth sòn Departament de Lengua, e era Universitat de Barcelona.

S’a balhat compde des actuaus e futures collaboracions sus er ensenhament der aranés en Barcelona. Cau remercar qu’es corsi d’aranés que s’impartíssen ara ena universitat compden damb eth supòrt deth Conselh Generau d’Aran, qu’ei qui autrege es títols oficiaus tàs diferenti nivèus de competéncia lingüistica.

Pera tarde, era sindica d’Aran a inaugurat, amassa damb eth delegat deth rector de Politica Lingüistica, Joan Santanach, es jornades “Maig aranès” organizades pera UB ath torn dera lengua e cultura d’Aran.

Vielha, 8 de mai 2024