• Era sindica d’Aran visitèc ager, acompanhada peth director gerent e eth conselhèr delegat dera estacion, es òbres que Baqueira amie a tèrme entara subsitucion deth telesèra deth Clòt der Os

Era sindica d’Aran, Maria Vergés, acompanhada peth director gerent de Baqueira Beret, Alex Barés, e eth conselhèr delegat dera estacion, Francis Coll, visitèc ager es òbres que Baqueira amie a tèrme entara substitucion deth telesèra deth Clòt der Os.

Pendent aguesta visita, era sindica volec “arregraïr a Baqueira Beret era inversion qu’amie a tèrme entà melhorar era estacion e adaptar-la as naui tempsi e as rèptes de futur que se plantegen” e metec de manifèst “eth naut nivèu de implicacion e de collaboracion de Baqueira damb eth Conselh Generau d’Aran pendent aguest an tant difícil entara gestion dera pandemia, ua collaboracion que s’amplie mès enlà dera situacion sanitària, coma empresa de referéncia en nòste territòri”.

En aguest sens, era sindica destaquèc era importáncia de mantier aguesta estreta collaboracion entà hèr front as rèptes de futur que se presenten en territòri coma, per exemple, era candidatura des Jòcs Olimpics Pirenèus-Barcelona o era implementacion de naues formules de gestion toristica ena Val d’Aran.

Era sindica d’Aran tanben reconeishec er esfòrç de Baqueira Beret era darrèra tempsada d’esquí, que mantenguec dubèrta era estacion en tot aplicar es mesures establides maugrat es dificultats sanitàries.