Era Val d’Aran, prèsta tà un ostiu segur e indesbrembable

  • Eth govèrn deth Conselh Generau d’Aran e eth sector toristic aranés an trabalhat des der inici dera crisi deth COVID-19 entà aufrir as visitants ues vacances d’ostiu segures e damb un ampli ventalh d’activitats entà gaudir der entorn, cultura e auvtiatge aranesi

  • En aguest sens, e dempús de diuèrses informacions apareishudes enes mieis de comunicacion, ei de besonh remarcar qu’era situacion de confinament pes rebròts de COVID-19 en Segrià non a cap relacion damb era Val d’Aran e es comarques pirinenques e non afècte tanpòc ath transpòrt

Era Val d’Aran ei prèsta entà afrontar ua sason d’ostiu diferenta dempús dera crisi sanitària provocada peth COVID-19. Es establiments otelèrs, de restauracion e comèrç aranesi s’an adaptat damb velocitat ara naua normalitat entà aufrir as sòns clients un servici segur e adaptat as mesures establides pes autoritats competentes.

Atau coma apunte eth Baromètre Toristic elaborat per Braintrust en sòn analisi der impacte dera COVID-19 en sector, es tendéncies generaus indiquen qu’es viatges en entorns naturaus seràn des prumèrs en repuntar aguest ostiu. En aguest sens, atau coma afirme eth conselhèr d’Economia, Torisme e Promocion economica, Josep Canut, “Aran ei ua destinacion privilegiada, non sonque peth sòn entorn de montanha, senon pr’amor deth tipe d’ostalaria qu’aufrís, damb petits otèls e ostaus familhars, campings e apartaments toristics, toti eri prèsti entà aufrir ua estada segura”.

“En aguesti moments, degut a cèrtes informacions apareishudes enes mieis de comunicacion, ei de besonh remarcar qu’era situacion de confinament ena comarca deth Segrià pr’amor des rebròts de COVID-19, non a cap relacion damb era Val d’Aran e es comarques pirinenques a nivèu sanitari ne a tanpòc cap afectacion a nivèu de transpòrt, pr’amor que se permet era mobilitat per carretèra e non i a afectacions a nivèu de transpòrt public (trens e autobusi) ne en aeropòrt de Lleida Alguaire”, afirme eth si, en tot híger que: “en Aran, ara per ara, dejà auem barrat eth bròt detectat en mes de junh e er Espitau Val d’Aran non a auut cap ingrès per coronavirus deth mes de mai ençà”.

Per un aute costat, eth sector servicis tanben a trabalhat des der inici dera pandèmia entà adaptar es sues activitats as naui tempsi e es visitants qu’escuelhen Aran entà passar es sues vacances d’ostiu poiràn gaudir d’un ampli ventalh d’activitats a escuélher.

En çò que hè as activitats ar aire liure, mès enlà des rotes de senderisme e ciclisme, era Val d’Aran aufrís tanben era oportunitat, des d’inicis de junhsèga, de realizar activitats guidades coma rafting, kayak, barrancs, vies o excursions a shivau. Entà aqueri qu’ac preferisquen, se pòden realizar rotes emblematiques coma era Pedals de Foc o eth Setau Sagèth o d’autes rotes itinerants de prestigi internacionau que dejà reben public de paisi coma Alemanha e Belgica.

Infraestructures coma Aran Park, Naturaran, eth Palai de Gèu o es piscines municipaus an dubèrt tanben ath public, en tot establir mesures de seguretat adientes.

En çò que hè referéncia as Musèus dera Val d’Aran an daurit aué es sues pòrtes e es visites guidades comencen eth pròplèu dia 13, atau coma era rota romanica pes glèises deth territòri.

Entre d’autes activitats, Baqueira daurirà eth sòn telecagira aguest 18 de junhsèga, atau coma eth trenet dera Artiga de Lin, e es taxis de Valarties e Colomèrs aufrissen tanben es sòns servicis enguan.

Totun, des deth govèrn deth Conselh Generau d’Aran s’insistís en demanar responsabilitat e prudéncia en tot aplicar es mesures de seguretat recomanades (distància, mascareta e igièna).

Comments are closed.