Eth Consell Català del Esport, amassa damb eth Conselh Generau d’Aran, Baqueira – Beret e eth Conselh Esportiu dera Val d’Aran, organizen eth programa Espòrt Blanc Escolar qu’es alumnes de 3au e 4au de primària des escòles ZER d’Aran e Escòla Garona pendent ueit setmanes consecutives poderàn realizar desparièrs espòrts de nhèu coma er esquí de hons, esquí aupin e snowboard en Baqueira-Beret.
Pendent aguest cors 2015/16 ei previst que participen en programa Espòrt Blanc Escolar un totau de 146 alumnes d’aguestes dues escòles dera Val d’Aran repartidi en 3 grops.
hònt: http://esqui-ando.jimdo.com/ Tònho Porras
En çò que tanh ara escòla ZER D’ARAN, es alumnes de 3au e 4au pujaràn a esquiar toti es dimars de 11:00 ores a 16:00 ores.
Dera escòla GARONA es alumnes de 3au pujaràn toti es dimèrcles de 11:30 ores a 16:00 ores e es dijaus serà eth torn des alumnes de 4au qu’ac haràn de 11:30 ores a 16:00 ores.
Un còp ena estacion es alumnes des desparièrs grops haràn 3 ores d’esquí de hons e dues ores d’esquí aupin e snowboard cada dia.
En çò que tanh ath desvolopament deth programa Espòrt Blanc Escolar, eth Consell Català del Esport ei qui hè era aportacion economica principau entà corbir toti es còsti de loguèr de materiau, forfait e pagament des tecnicians e monitors. Pera sua part eth Conselh Generau d’Aran se hè cargue des còsti de tot eth servici de transpòrt des alumnes. Era estacion d’esquí Baqueira -Beret aufrís prètzi especiaus e fòrça redusidi peth loguèr de materiau coma eth forfait, e eth Conselh Esportiu dera Val d’Aran s’encargue dera organizacion e era gestion deth programa.
As familhes de cada alumne aguest programa les supause un còst de 25 € en concèpte d’organizacion, assegurança esportiua e ua partida deth loguèr de materiau.
Era implicacion deth departament d’Ensenyament en programa Espòrt Blanc Escolar, hè possible qu’aguest programa sigue includit laguens deth curriculum escolar e sigue part dera matèria d’educacion fisica.
Eth vicesindic d’Aran e conselhèr d’Espòrts e Joenessa Luís Carlos Medina, a volut destacar era implicacion deth Conselh Generau d’Aran, des escòles e es familhes araneses en aguest tipe de programes, que vien a renfortir, “era atencion deth govèrn d’Aran en foment der espòrt de basa damb er objectiu de formar joens qu’en un futur poguen accedir a concórrer coma esportistes d’elèit en desparières disciplines d’esquí, snowboard e de patinatge sus gèu, entà auançar entà ara aspiracion dera Val d’Aran de poder quauque dia organizar en nòste país uns Jòcs Olimpics d’Iuèrn “.
Ei previst qu’eth pròplèu an entren laguens deth programa Espòrt Blanc Escolar eth rèste d’escòles dera Val d’Aran (Escòla Alejandro Casona de Les e Escòla Sant Ròc de Bossòst).
Ací trobaràtz er orari des autobusi:
https://www.conselharan.org/wp-content/uploads/2016/01/HORARI-AUTOBUS-15-16.pdf
hònt: http://esqui-ando.jimdo.com/ Tònho Porras