Eth codirector dera UTMB®, Michel Poletti, e eth CEO de InAran Sports, Xavier Pocino  s’an amassat damb eth sindic d’Aran, Francés X. Boya, er alcalde de Vielha e Mijaran, Juan A. Serrano e damb eth còsso d’Espòrts der Ajuntament de Vielha e Mijaran, Alberto López tà presentar era carrèra Val d’Aran by UTMB®, eth nau eveniment internacionau de trail running que se celebrarà ena Val d’Aran e se desvoloparà coma ua collaboracion a long termini entre UTMB® International e InAran Sports, damb era collaboracion deth Conselh Generau d’Aran e der Ajuntament de Vielha e Mijaran.

Era prumèra edicion dera carrèra se disputarà en junhsèga de 2020 e formarà part des eveniments internacionaus etiquetats UTMB®, en tot integrar a compdar de 2020 eth nau circuit internacionau de ultra-endurance trail running neishut dera associacion recentaments signada entre UTMB® e eth Ultra-Trail® World Tour.

“Aguest ei un projècte fòrça important entara Val d’Aran pr’amor qu’era Val d’Aran by UTMB® serà eth 5au eveniment dera UTMB®, en tot junher-se a d’autes destinacions emblematiques e toristiques coma era UTMB® Mont-Blanc, Gaoligong by UTMB®, Oman by UTMB® e Ushuaia by UTMB®” a manifestat eth sindic d’Aran, Francés X. Boya.

Vielha, 3 de junhsèga de 2019