Vielha, 23 de hereuèr de 2018.- Es Pompièrs d’Aran assistiren ager a ua jornada practica des pompièrs francesi dera agropacion dera Haute Garonne que se realizèc enes installacions deth nau tunèl de Saint-Béat. Tau e coma auancèc era setmana darrèra era Sous-Préfrète de Saint-Gaudens, Marie Paule Demiguel, en ua reünion damb eth sindic d’Aran, Carlos Barrera, ei previst qu’eth nau tunèl de Saint-Béat entre en foncionament a miejans deth pròplèu mes d’abriu.

Era preséncia des Pompièrs d’Aran en tunèl de Saint-Béat s’enquadre ena collaboracion permanenta que mantien damb es pompièrs e servicis d’emergéncies francesi. Cap arrebrembar qué pendent er an 2017, es Pompièrs d’Aran se desplacèren enquia cinc còps en França entà dar supòrt as companhs francesi en diuèrses accions d’emergéncia. Per d’auta part, hè pòqui dies, eth passat 10 de hereuèr, dues dotacions des pompièrs francesi collaborèren en escandilhament der incendi en un abitatge unifamilhau d’ua urbanizacion de Salardú.

Atau madeish ua delegacion des Pompièrs dera agropacion Sud dera Haute Garonne, dirigida peth Tinent Coronèl Sylvaine Gergaud acompanhat des responsables des Parcs de Pompièrs francesi mès pròplèus ara Val d’Aran, realizèren eth mes de març der an passat ua visita as installacions deth Tunèl de Vielha, gestionat peth Ministèri de Foment, que compdèc damb era preséncia deth conselhèr de Territòri deth Govèrn d’Aran, José Antonio Boya e deth director d’Explotacion deth Tunèl de Vielha.