Eth sindic d’Aran, Carlos Barrera, amassa damb eth delegat deth Govern dera Generalitat de Catalonha en Naut Pirenèu e Aran, Albert Alins, eth responsable d’Emergéncies Pompièrs d’Aran, Joan Canalias, e era vicepresidenta dera Deputacion de Lhèida, Rosa Pujol Esteve, an presidit aué, dia 4 de deseme, es actes de celebracion de Santa Barbara, patrona deth còs des Pompièrs dera Val d’Aran.

Era celebracion a començat damb tòcs de sirènes pes pòbles dera Val d’Aran damb es coches des Pompièrs, ara seguida s’a oficiat era missa ena glèisa de Santa Maria de Mijaran en aunor a Santa Barbara, e s’a sauvat ua menuta de silenci pes Pompièrs defuntadi. En acabar, en parc des Pompièrs de Vielha, es Pompièrs an celebrat eth dia dera sua patrona damb toti es convidadi e damb era rèsta de ciutadans.

Pendent er acte de celebracion, eth responsable d’Emergéncies Pompièrs d’Aran, Joan Canalias, a arregraït eth trabalh qu’amien a tèrme jornalièraments es Pompièrs d’Aran e ar esfòrç des sues familhes, tanben a arregraït era preséncia de representants des còssi e fòrces de seguretat der Estat, de responsables deth còs de Mossos d’Esquadra e de Pompièrs e Gendarmes der Estat Francés.

Ena sua intervencion eth sindic d’Aran, Carlos Barrera, maximal representant deth Conselh Generau d’Aran, ath delà d’arregraïr er inestimable trabalh des Pompièrs d’Aran a manifestat “Santa Barbara, patrona deth còs des Pompièrs d’Aran ei ua celebracion sociau de reconeishement ath collectiu dera estructura d’emergéncies. Aué, ei era prumèra celebracion dempús dera aprobacion dera Lei d’Aran eth passat mes de gèrt. Eth repte de futur dera Val d’Aran en ambit des emergéncies ei era creacion d’un ens de gestion integrau des emergéncies. Eth Conselh Generau d’Aran a auançat er estudi legau entà hèr pòssible era implantacion d’aguest nau modèu damb eth convenciment qu’un viatge metut en marcha poderà éster un referent d’aplicacion en d’auti territòris.”

Barrera, a soslinhat qu’”es Pompièrs reflectisen ena societat uns valors qu’an de prevaler tostemp entà garantir tranquillitat e confidança as ciutadans.”