Eth sindic d’Aran, Carlos Barrera, amassa damb eth secretari general d’Interior dera Generalitat de Catalonha, Cèsar Puig, an presidit aué, dia 4 de deseme, es actes de celebracion de Santa Barbara, patrona deth còs des Pompièrs dera Val d’Aran.
Era celebracion a començat damb tòcs de sirènes pes pòbles dera Val d’Aran damb es coches des Pompièrs, ara seguida s’a oficiat era missa ena glèisa de Santa Maria de Mijaran en aunor a Santa Barbara, e s’a sauvat ua menuta de silenci pes Pompièrs defuntadi. En acabar, en parc des Pompièrs de Vielha, es Pompièrs an celebrat eth dia dera sua patrona damb toti es convidadi e damb era rèsta de ciutadans.
Pendent er acte de celebracion, eth secretari general d’Interior dera Generalitat de Catalonha, Cèsar Puig, a arregraït eth trabalh qu’amien a tèrme es Pompièrs d’Aran e a soslinhat: “Es accions que s’an amiat enguan coma era installacions des sensors ath long der arriu Garona, hònt d’ua fòrça bona collaboracion, era experiéncia des riuades deth 2013 que patic era Val d’Aran son ua referéncia que s’estudiarà a nivèu europèu tà granes emergéncies. Enes pròplèus ans, eth Departament d’Interior trabalharà fòrça entà mielhorar es equipaments des Pompièrs. Contunharam parlant damb eth sindic d’Aran des peculiaritats qu’an d’auer es Pompièrs d’Aran pera singularitat deth territòri, mos preocupe respectar aguesta singularitat e trapar era maximala eficiéncia pera prestacion deth servici. Nosati entenem qu’açò ei compatible e de ben segur que lèu traparam era formula e entre toti sabem qu’eth servici des Pompièrs ei un servici excellent e de cara ath futur a d’auer modernitat. Mostrar era totau collaboracion deth Departament d’Interior damb eth Govèrn d’Aran”.
Ena sua intervencion eth sindic d’Aran, Carlos Barrera, maximal representant deth Conselh Generau d’Aran, ath delà d’arregraïr er inestimable trabalh des Pompièrs d’Aran a manifestat: “Era Val d’Aran a d’èster çò que tostemp a estat: un lòc que pòt dar responsa as sues emergéncies, as nòsti vesins, e que tanben auem d’arrecéber supòrt en moments critics que s’en poguen dar en nòste país. Eth 2016 a estat un an fòrça important en dus aspèctes, er un ei eth des inversions enes estructures d’emergéncies dera Val d’Aran, es inversions que’ s’an hèt e programat enes Parcs de Bossòst, Les e de Vielha, equipaments sustot tar equip de rescats de montanha des Pompièrs d’Aran. Era formacion a esta plan importanta, eth compartir era nòsta realitat damb es operadors dera sala centrau d’emergéncies e qu’agen estat aciu e qu’agen vist coma ei era nòst pròpia estructura. Tar an que ven, auem d’incorporar dues naues ambulàncies”.
Barrera a hijut: “Ua bona notícia siguec una naua convocatòria de pompièrs volentaris que se hèc des deth pròpi Departament e qu’en cas des parcs dera Val d’Aran s’incorporaràn 21 naui pompièrs volentaris, çò que demòstre er esperit de renovacion d’aquera volentat d’èster çò mès autosuficents possibles, tà dar ua responsa immediata as nòsti besonhs. Aguesta illusion ei viua perquè es candidats, aqueri joeni que vòlen optar a ua d’aqueres 21 places son molti”.
Entà finalizar, Barrera, a soslinhat: “En airau administratiu auem hèt tot çò qu’auem pogut hèr cap a un nau modèu d’emergéncies d’Aran. Hèm enes darrèri tramits, e demoram qu’en prumèr trimesadèr deth 2017 se pogue culminar tot aguest procès e aquiu ei a on dejà auram d’entrar damb era negociacion damb eth collectiu d’aguesta naua estructura de Pompièrs/Emergéncies. Sense era implicacion, era volentat e tot er esfòrç qu’es nòsti Pompièrs estan hènt tà formar-se tà dar ua responsa immediata as besonhs deth nòsti país, non serie possible ua estructura coma era qu’a era Val d’Aran. Estam dessenhant un modèu d’emergéncies d’exit e un referent d’aplicacion en d’auti territòris.”
Vielha, 4 de deseme de 2016
Conselh Generau d’Aran: Núria Sanjuan