• Eth programa compde damb er investigador de Harvard Ramon Gras, eth president deth RACC, Josep Mateu, e eth secretari de Territòri, Urbanisme e Agenda Urbana dera Generalitat, Víctor Puga, entre d’auti ponents.

• Era dubertura der acte inaugurau correrà a cargue dera sindica d’Aran, Maria Vergés, acompanhada deth president dera Deputacion de Lhèida, Joan Talarn, er alcalde d’Esterri d’Àneu, Pere Ticó, e eth president des Jornades pera Excelléncia, Jesús Montoliu. Era clausura serà a cargue dera conselhèra de Territòri, Abitatge e Transicion Ecologica dera Generalitat, Sílvia Paneque, acompanhada pera ministra d’Ahèrs Exteriors deth Govèrn d’Andòrra, Imma Tor.

Es XIII Jornades entara Excelléncia ja an barrat eth sòn programa, que se desvoloparà es dies 2 e 3 d’octobre en pavellon poliesportiu d’Esterri d’Àneu. Aguesta naua edicion compdarà damb expèrts e responsables politics de prumèr nivèu, damb er objectiu de promòir era reflexion e generar prepauses ath torn dera mobilitat e es comunicacions en Pirenèu.

Aguesta edicion, que pòrte per títol «Pirenèus en hilat: mobilitat e connectivitat», compdarà damb ua quarantea de ponents de reconeishuda trajectòria, entre es quaus Ramon Gras, CEO d’Aretian and City Science e investigador en dessenh urban ena Universitat de Harvard; eth president deth RACC, Josep Mateu; er exconselhèr, assessor e doctor en engenheria, Pere Macias; Víctor Puga, secretari de Territòri, Urbanisme e Agenda Urbana dera Generalitat; David Forné, secretari d’Estat de Transicion Energetica, Transpòrts e Mobilitat deth Govèrn d’Andòrra; Núria Cervós, CEO de Cervós e presidenta deth Grèmi de Constructors des Tèrres de Lhèida; Daniel Paül, geograf e director deth Màster en Gestion d’Airaus de Montanha dera Universitat de Lhèida; Lara Iglesia, CEO de Pirineos Drone Aviation; César Marquina, deputy CEO d’Andorra Telecom; Noelia Souque, ambaishadora entara cooperacion transfronterèra deth Govèrn d’Andòrra; Rafael Giménez, president dera Societat Catalana de Geografia, o Pedro Malavia, responsable d’Actuacions dera Sosdireccion Generau de projèctes e òbres deth Departament de Territòri, entre d’auti.

Era dubertura der acte inaugurau serà a cargue dera sindica d’Aran, Maria Vergés, e compdarà tanben damb era participacion deth president dera Deputacion de Lhèida, Joan Talarn; er alcalde d’Esterri d’Àneu, Pere Ticó, e eth president des Jornades pera Excelléncia, Jesús Montoliu.

En aquerò que hè ara clausura des Jornades, aguesta serà a cargue dera conselhèra de Territòri, Abitatge e Transicion Ecologica dera Generalitat, Sílvia Paneque, qu’intervierà acompanhada pera ministra d’Ahèrs Exteriors deth Govèrn d’Andòrra, Imma Tor.

Er eveniment d’enguan compdarà damb diuèrses nauetats importantes. Entre aguestes, subergés era presentacion d’empreses emergentes deth Pirenèu, que dispausaràn d’un espaci pròpri laguens des Jornades e poderàn optar a un prèmi destinat a impulsar eth desvolopament deth sòn projècte empresariau e professionau.

Tanben se presentarà ua enquèsta realizada entre entitats e vesins damb inquietuds e prepauses relacionades damb era mobilitat, es infraestructures e era connectivitat en Pirenèu. Era organizacion a recebut mès de 300 responses en aguest nau projècte, que permeterà conéisher es besonhs e es prepauses dera societat pirenenca.

Ua auta des nauetats d’aguesta edicion ei era reestructuracion deth format, damb era volontat d’incrementar eth debat e era participacion des ponents. En aguest sens, s’a redusit eth nombre de taules e ponents e s’an ampliat es tempsi de cada session, atau coma es pòses, entà potenciar es trobades e afavorir eth networking e er escambi d’experiéncies entre es participants.

Era organizacion des Jornades entara Excelléncia, presidida per Jesús Montoliu, compde damb era ja consolidada collaboracion deth Govèrn d’Andòrra, que organizaue ua session prealabla eth passat 17 de seteme en Teatre des Fontetes dera Massana.

Eth Conselh Generau d’Aran tanben participe ena organizacion e a previst realizar ua session posteriora pendent eth mes de noveme.

Vielha, 27 de seteme de 2026