ETH CAMPION DE FREE SKI, AYMAR NAVARRO, INAUGURARÀ DEMAN ER SNOWFEST 2015

INAUGURACION SNOWFEST PIRENÈUS
VAL D’ARAN. 27 DE NOVEME 2015

AYMAR NAVARRO

 

Eth campion de freeriding, Aymar Navarro, daurirà coma pairin er acte inaugurau dera tresau edicion deth Snowfest Pireneus 2015 ena Val d’Aran. Serà deman diuendres 27 de noveme en Vielha, en un acte a on assistiràn representants institucionaus dera Val d’Aran coma Anna Díaz, conselhèra de Torisme e Desvolopament Economic d’Aran e eth vicesindic e conselhèr d’Espòrts d’Aran, Luis Carlos Medina. En aguesta edicion de Snowfest i serà tanben present Oriol Balaguer, un des melhors mèstres pastissers d’Espanha, qu’a realizat eth Bombon Snowfest entad aguesta edicion 2015.

Er Snowfest 2015 arrincarà aguest diuendres 27 de noveme damb era inauguracion oficiau, presidida per Aymar Navarro, pairin dera edicion d’enguan, qui ath costat de personalitats der encastre public e institucionau darà eth trèt de gessuda entara alugada dera illuminacion de Nadau e daurirà era convocatòria d’un flasbmob snowdance entà barar e propiciar era sason de nhèu.

Aymar Navarro se classifiquèc entre es 10 melhors freeriders deth mon en Swatch Freeride World Tour North Face, un circuit en quau hè concurréncia era “flor e nata” deth freeride mondiau. Crubèc notorietat per un vidèo convertit en fenomèn viral, en quau se ve coma ac engolís un laueg, que podec superar pera sua excellenta evolucion coma esquiaire. Entà eth, que se considère sustot aranés, “ei un orgulh èster eth pairin der Snowfest d’enguan, d’ua hèsta que celèbre era nhèu, que entà nosati en Aran ei simbèu de prosperitat e alegror”.

Dempús dera inauguracion començarà eth completíssim programa dera edicion d’enguan. Eth dissabte 28 peth maitin s’inaugurarà era Winter Expo, un salon de materiau tecnic de nhèu e mòda d’iuèrn que per prumèr an acuelh a petiti fabricadors des Pirenèus. En aguest madeish recinte, Oriol Balaguer presentarà eth Bombon Snowfest 2015 en ua degustacion publica. Era equipa de dessenh de SarahWorld, mèrca joena deth grop Sara Navarro cabecièr deth sector de cauçat en Espanha, presentarà ena edicion de Snowfest Pireneus 2015 era colleccion càpsula SarahWorld de sabates e complements d’iuèrn Eco-cold, Eco-chic. Se presentarà tanben en “premiére” era Bossa Pirenèus, dessenhada entara tresau edicion d’aguest hestivau

Era tarde deth dissabte arrincarà damb era projeccion deth vidèo “Searching the Line” d’Aymar Navarro, entà contunhar damb un espectacle de patinatge artistic que recree scènes de Rey León, eth concèrt deth grop indie-ròck Kid Wise e ua session de musica electronica damb eth DJ D-Yan.

E fòrça mès, pr’amor que i aurà tanben desfilades de mòda, eth balh ar estil Bollywood, passades de documentaus restacadi damb era nhèu coma era projeccion eth première d’Aguestes Montanhes, ioga, visites guidades per bères ues des mès bères glèises romaniques dera zòna e un long eca d’activitats entà toti es publics. Eth programa culminarà damb eth sortèg de fortfaits entara estacion de Baqueira Beret, esquís, e ua plaça entà GORE-TEX Experience Tour, ua expedicion de Freeriding ath costat d’Aymar Navarro, que debanarà enes isles Lofoten era 2016 aufèrta per Flocs Ski- Center.

Aguestes activitats son possibles gràcies ara collaboracion deth Conselh Generau d’Aran, Torisme Val d’Aran, Baqueira-Beret, es Ajuntaments de Vielha e Mijaran, Bossòst e Naut Aran, era Deputacion de Lhèida o eth Consòrci de Comèrç e Mòda de Catalonha (Generalitat de Catalonha) e fòrça autes entitats e establiments collaboradors que s’an somat a ua celebracion dubèrta a toti, ua celebracion dera alegror, era natura e era nhèu.

Snowfest Pirenèus- Benvengut er iuèrn

Snowfest Pirenèus ei un hestivau dera nhèu que neishec eth 2013 e qu’eth 2015 celèbre era sua tresau edicion deth 27 ath 29 de noveme, ena Val d’Aran (Lhèida), entà dar era benvenguda der iuèrn enes Pirenèus. Er eveniment diferéncie dus aspèctes: un Hestivau, damb activitats esportiues, ludiques, artistic- culturaus, musicaus e gastronomiques a trauès d’un complèt programa entà toti es publics que rebat era manèra de vida e es activitats de montanha mès destacada des Pirenèus centraus. Ua hèira, damb eth salon d’iuèrn Winter Expo en Palai d’Espòrts de Vielha, a on s’exibiràn prumères mèrques de nhèu (ròba tecnica e materiau d’espòrt), mòda d’iuèrn, es prepauses d’òci de torisme iuernau e era presentacion des eveniments dera sason de nhèu.

Comments are closed.